Димитров се сретна со Ерхард Бусек и претставници на поранешниот Пакт за стабилност за ЈИЕ

Министерот за надворешни работи, Никола Димитров попладнево во Скопје беше домаќин на делегација од поранешниот Пакт за стабилност за Југоисточна Европа предводена од поранешниот вице-канцелар на Австрија и последниот специјален координатор на Пактот, Ерхард Бусек.

Како што соопшти МНР, на средбата одржана во Министерството се разговараше за актуелните случувања во земјата и регионот, со акцент на Договорот од Преспа, како еден од главните интереси на експертската група.

Поранешниот вице-канцелар на Австрија, Бусек го поздрави Договорот од Преспа и ја нагласи визионерската улога на политичарите од двете земји, нагласувајќи дека овој Договор може да биде модел за решавање и на други тешки прашања, не само во регионот, туку и пошироко.

Димитров, од своја страна, се посочува, даде пресек за актуелната политичка состојба и постигнувањата како на внатрешен, така и на надворешен план, а се разговараше и за очекуваната политичка одлука за отпочнување на преговорите со ЕУ.

-Ниту ние, ниту ЕУ не може да си го дозволи луксузот да пропушти шанса за консолидирање на успехот каков што е нашата приказна изминативе две години. Затоа ќе дадеме се’ од себе сите да се уверат во очигледното, истакна министерот за надворешни работи Димитров, стои во соопштението.