Дарко Спасов в.д. директорот на „Комедија“ поднесе оставка

По нешто повеќе од една година на функцијата в.д. директор на театарот „ Комедија“, Дарко Спасов поднесе оставка. Во изјава за Телма тој кажа дека оставката ја дал од лични причини.

„Точно е. Депонирав неотповиклива оставка во Министерството за култура , на функцијата в.д. директор на театарот “Комедија“. Оставката е од лични причини. Останувам да работам во театарот како драматург. А, како в.д. директор театарот го оставам во одлична финансиска кондиција, со полна каса, кажа Спасов.

Од Министерството за култура кусо ни одговорија дека треба да назначат нов в.д. директор на „Комедија“ и во исто време да ја прифатат оставката на Спасов.

Дарко Јан Спасов, стапи на функцијата в.д. директор на „ Комедија“, кон средината на јануари минатата година. Тој дојде на местото на Магдалена Ризова- Черних, која кратко време беше в.д. директорка.

Со одлука на министерката за култура, тогаш во заминување , Ирена Стефоска, Спасов беше поставен за в.д. директор. Ансамблот на „ Комедија“, побара од Министерството за култура тој да ја врши функцијата откако беше разрешена Нора Шаќири – Марковиќ.