Дали канцерогениот чипс од Србија го има во македонските продавници?

Агенцијата за храна и ветеринарство (АХВ) врши проверки дали канцероген чип произведен во Србија завршил на македонскиот пазар. Ако се потврди дека го има во земјата, производот веднаш ќе биде повлечен од продажба.

Проверките следат по алармот дека во чипсот е откриено високо ниво на акриламид.

„Во Системот за брзо предупредување на ниво на ЕУ сѐ уште не е нотирано дека овој производ е забранет и дека треба да се повлече од пазарите, а дали е кај нас влезен или не, веќе проверуваме“, вели директорот на Агенцијата за храна и ветеринарство (АХВ), Николче Бабовски.

Европската комисија прва го вклучи алармот дека високо ниво на канцероген акриламид е откриен вочипс со вкус на пиперка, произведен во Србија. На хрватска граница била стопирана пратка на чипс со вкус на пиперка, произведен во Србија, во кој е утврдено високо ниво на акриламид. Проблемот е пријавен до Европскиот систем за рано предупредување, по што производот е безбедно уништен.

Од српското Министерство за земјоделство информираа дека во тек е вонредна контрола во погоните каде се произведува чипсот.

Зошто е опасен акриламидот?
Акриламидот најчесто може да се најде во леб, пржени компири, чипс, житарки за појадок, бисквити, крекери, кафе. Станува збор за хемиско соединение кое се формира во храната при термичка подготовка – печење или пржење. Проценките се дека присуството на акриламид во храната може да го зголеми ризикот од развој на рак кај сите возрасни групи, а досегашните истражувања за потенцијалните ефекти од внесувањето на акриламидот преку исхраната врз здравјето на животните и луѓето, покажале и ефекти врз нервниот систем.

Канцерогениот ребрест чипс со вкус на пиперка е од чачанскиот производител Chips way

За ребрестиот чипс со вкус на пиперка од 150 грама од Чачанскиот производител Chips way, при извозот во Хрватска, било откриено дека содржи недозволено количество акриламид, дознава белградска Н1 од Државниот инспекторат на Хрватска, јави дописникот на МИА од Белград.

-Станува збор за производителот Chips way d.o.o. од Чачак и производот ‘CHIPS bits&bytes rebrasta paprika’ во пакување од 150 грама, се наведува во одговорот за Н1 на Државниот инспекторат на Хрватска.

Чипсот што беше извезен од Србија во Хрватска, каде што беше уништен поради недозволено количество акриламид, беше со рок на траење до 25 декември 2023 година.

Бар кодот на овој производ е 3 856025 853261, серија L28062023 (L280623 A09:31).

Високи нивоа на акриламид се откриени во чипс со вкусот на пиперка, произведени во Србија, откако проблемот го пријави Хрватска, соопштија на веб-страницата на Европскиот систем за брзо предупредување.

Производот не влегол на хрватскиот пазар и е безбедно уништен, јавува Н1 од Загреб.

Според соопштението на веб-страницата на Министерството за земјоделство на Србија, по добиеното известување на RASFF за покачено ниво на акриламид во чипсот од прехранбениот производ со вкус на пиперка произведен во Србија, земјоделската инспекција издала наредба за вонреден преглед на фабриката за производство на спорниот производ.

– Контролата е во тек и по добивањето на резултатите од анализите ќе објавиме подетални информации и мерки што ќе ги преземе земјоделската инспекција, соопштија од ресорното министерство.

Акриламидот не може да се најде во свежата храна и главно се формира при преработка на храна на температури над 120 степени, како и при ниска влажност, што значи печење, пржење и други форми на подготовка.

Најчесто се наоѓа во лебот, помфрит, чипс, житарки за појадок, бисквити, крекери и кафе.

Ова соединение беше подетално истражено и пронајдено во одредени видови храна во 2002 година во Шведска.

Оттогаш јавноста е предупредена за нејзините последици, а особено загрижува поврзаноста со некои форми на рак. Акриламидот се претвора во телото во глицидамид, кој предизвикува мутации и ја оштетува ДНК.

Како што соопшти хрватската агенција за храна, се проценува дека присуството на акриламид во храната може да го зголеми ризикот од развој на рак кај сите возрасни групи.