Бугарската влада го одобри нацрт-договорот со Македонија за тунелот кај Деве баир

Бугарската влада направи чекор напред околу реализацијата на железничкиот тунел на Деве баир одобрувајќи го на денешната седница нацрт-договорот со Македонија за неговата изградба.

Според соопштението на прес-службата на владата таа на денешната седница разговарала за формирање мешовит комитет и понатаму со македонската страна ќе раговара за текстот на договорот.

Како што пренесува БТА, целта е да се направат јасни обврски и рокови за изградба на железничката врска меѓу Бугарија и Северна Македонија.

„Министерството за транспорт и врски како страна на договорот предлага двете страни да преземат реални активности за реализација на објектот на железничкиот тунел, кој е железничка врска меѓу двете соседни земји. Изградбата на стратешкиот транспортен Коридор VIII е предуслов за комерцијална и индустриска размена, како на билатерална основа меѓу Бугарија и Република Северна Македонија, така и за земјите од регионот“, стои во соопштеието.

Во декември, стои во информацијата, Министерството за транспорт и врски побарало јасни заложби и рокови за изградба на железничката врска меѓу Бугарија и Македонија да бидат направени во меѓувладин договор.

За третиот дел од пругата кон Бугарија македонската и  бугарската страна досега одржаа две средби, една во Брисел на 16 октомври кога се согласија  да одржат редовен дијалог на високо ниво и да формираат заедничка работна група за Коридорот 8 и една во Софија на 31 октомври по која македонската страна објави дека се прифатени нејзините аргументи: да има заеднички проект за да не се гради тунел кој не води никаде, Бугарија да го заврши својот дел од пругата и да се ревидира цената и на самиот проект.

Првиот дел од пругата кон Бугарија, од Куманово до Бељаковце, во должина од 31 километар, веќе се заокружува и ќе биде пуштен во употреба во јануари. На вториот дел, од Куманово до Крива Паланка, изградени 27,3 проценти, а рокот е 2026 година.