Богоев: Очекувам процесот за уставни измени во Собранието да почне пред летото
Уставните измени се важни за членството во ЕУ кое значи бројни придобивки за граѓаните и државата, потенцираше потпретседателот на СДСМ, Стефан Богоев во интервју за емисијата „Патот кон“ на Алсат М телевизија.
-Членство во ЕУ значи повеќе пари во државата, повеќе инвестиции, повеќе работни места, поголем извоз на фирмите кои произведуваат тука а ќе можат да извезуваат. ЕУ значи подобри можности за образование на младите од Македонија, можност да одат да студираат таму а знаењето од ЕУ да се вратат и да го имплементираат тука, рече Богоев.
Богоев потсети дека само во изминатите неколку месеци поддршката од ЕУ за земјава е над 200 милиони евра.
-Само во изминатите неколку месеци поддршката од ЕУ е над 200 милиони евра. 100 милиони евра за справување со енергетската криза, околу 80 милиони евра за справување со економската криза, да може да ги избегнеме ценовните шокови, 53 милиони од тие пари се за проекти, ветерни паркови, хидроцентрали, регионални депонии кои ќе ја исчистат државата од отпад. Ете тоа значи ЕУ и затоа се важни уставните измени, рече Богоев.
Двотретинско мнозинство е потреба на државата, затоа што имаме историска шанса да ја оствариме европската иднина, порача потпретседателот на СДСМ, повикувајќи ги сите пратеници и политички партии интересите на државата да ги стават на прво место.
Одговарајќи на прашање кога би се очекувал почетокот на процедурата за носење на уставните измени, потпретседателот Богоев посочи дека според предвиденото тоа ќе се случи кон крајот на пролетта.
-Со заокружување на процесот на реконструкција на Владата, очекувам да почнат разговори околу јавната широка дебата околу уставните амандмани, да се отвори дискусија и со пратениците и со стручната фела, да им се објасни на граѓаните, што значи тоа, да им се објасни дека тоа значи делови од народи, дел од Бугарите, Хрватите, Црногорците, Торбешите, да бидат застапени во Уставот. Да се дискутира со стручната фела како тие амандмани најдобро да изгледаат, но и да се објасни дека тоа може само да ја зајакне Македонија, не може да ја ослаби. Ако тоа се случи по завршување на реконструкција, тој процес на широка дебата би требало да заврши некаде кон крајот на пролетта и почетокот на летото, односно месец мај би бил месецот кога би започнала процедурата за уставните измени во Собранието, порача Богоев.
Богоев го оцени и однесувањето на опозицијата по однос на ова прашање, првенствено на ВМРО-ДПМНЕ и Христијан Мицкоски.
-Жално е да пратениците на ВМРО-ДПМНЕ да потпишуваат нотарски изјави, Мицкоски и челници на партијата да водат кампања за наводна за бугаризација и асимилација, а во позадина да одат по амбасади и даваат гаранции дека доколку тие дојдат на власт, без проблем ќе ги спроведат уставните измени, истакна Богоев, додавајќи дека ВМРО-ДПМНЕ досега не учествувала во ниту една државничка одлука важна за иднината на граѓаните.
Предлог закон за ветинг во следните три месеци, правиме исчекор во делот на владеење на правото
Законот за ветинг би подразбирал поедноставување на процедурите и вмрежување на институциите да го проверат имотот на функционерите, како и потекло на имот, потекло на пари, имот на блиски и слично, порача потпретседателот на СДСМ Стефан Богоев во емисијата „Патот кон“ на Телевизија Алсат М.
-Мислам дека може да се очекува во следните три месеци да имаме таков закон кој ќе влезе во собраниска процедура, ќе има јавна расправа и ќе се земат некои искуства и практики од ЕУ и од други развиени држави во западна Европа и од светот кои имаат вакви закони. Мое мислење еека ќе добиеме еден систем и механизам не само за сега туку и во иднина, сите функционери да мораат да докажат потекло на имот, а ова да биде проследено со унапредување на Закон за конфискација на имот. Со овој закон ќе направиме голем исчекор на полето на владеење на правото, посочи тој.
Богоев додаде дека токму Законот за ветинг на функционери бил дел од платформата за коалицирање со Алијанса за Албанците.
-Подобар економски стандард, членство во ЕУ и владеење на право беа главните столбови на соработка, каде влегува предлог закон за ветниг на функционери кој верувам ќе биде навистина корисен и битен, а тој закон исто така го поддржува целата коалиција и секако и СДСМ, потенцира Богоев.