Белата куќа ја откажа претплатата за „Политико“ од 8 милиони долари по лажните десничарски теории на заговор

Прес-секретарот на Белата куќа, Каролин Левит, одговарајќи во средата на прашање за теоријата на заговор на десницата, објави дека федералната влада ќе ги откаже претплатите на „Политико“ во вредност од 8 милиони долари.

Левит го подигна на ново ниво лажното тврдење што се шири на социјалните мрежи дека „Политико“ и Асошиетед прес со години добивале милиони долари од американската Агенција за меѓународен развој (УСАИД), кои претседателот Доналд Трамп и Илон Маск го таргетираа ставајќи го персоналот на принуден одмор. Во реалноста, плаќањата ја претставуваа целата претплата на федералната влада за услугите на медиумот. Сите федерални агенции заедно потрошија 8,2 милиони долари минатата година на „Политико Про“.

На прес-брифингот во Белата куќа, Левит им рече на новинарите дека била информирана за финансирањето на медиумите од УСАИД, вклучително и „Политико“, и истакна дека доларите од даночните обврзници кои се доделени за „суштински субвенционирање на претплати на ‘Политико’ со парите на американските даночни обврзници повеќе нема да се случуваат“.

Но, како што репортерите брзо истакнаа како одговор на лажните изјави на социјалните мрежи, плаќањата не се исклучиво средства на УСАИД.

„Ги погледнав овие договори и имам свој забавен факт“, рече Бајрон Тау, истражувачки новинар во Асошиетед прес, преку Икс. „Ова се случува затоа што агенциите (не само УСАИД) купуваат претплати на уредувачкиот производ на ‘Политико’, а не затоа што ‘Политико’ добива грантови или други федерални финансирања“.

Фокусот на администрацијата на Трамп на лажниот наратив дека „Политико “добивал средства од УСАИД следи по погрешното тврдење на Кајл Бекер, конзервативен политички коментатор, во средата.

„Забавен факт: @Politico доби средства од УСАИД“, рече Бекер преку Икс. „Сега сè има смисла“.

Објавите на Бекер брзо го привлекоа вниманието на екстремно десничарските медиумски личности.

Водачите на „Политико“, Голи Шејхолеслами и Џон Харис во меморандум до вработените во средата, негираа дека медиумската компанија добила какво било финансирање од владата.

„’Политико’ никогаш не бил корисник на владини програми или субвенции – ниту еден цент во последните 18 години“, напишаа лидерите на медиумот во меморандумот.

Медиумската компанија призна дека владините агенции се претплатуваат на нејзината про-услуга, исто како што прават корпорациите. „Вредноста на ова новинарство е јасна, како што сведочат нашите стапки за повторно ангажирање на претплата“, рекоа водачите на „Политико“.

Во соопштението, АП рече дека федералната влада „долго време е клиент на АП – и преку демократската и републиканската администрација“.

„Го лиценцира непартиското новинарство на АП, исто како и илјадници новински куќи и клиенти низ целиот свет“, велат од АП. „Сосема е вообичаено владите да склучуваат договори со новински организации за нивната содржина“.

Ова не е првпат администрацијата на Трамп да предизвика возбуда поради претплатите на федералните вработени на новинските организации. Во 2019 година, администрацијата на Трамп ги повика сите федерални агенции да ги прекинат своите претплати на „Вашингтон пост“ и „Њујорк тајмс“, откако Белата куќа објави дека ќе ги „прекине“ своите претплати на весниците.