Арсовска ќе го доградува мостот во Аеродром

Мостот на крајот од булеварот „АСНОМ“ во Аеродром, сепак ќе се догради, брифираше денеска градоначалничката на Скопје, Данела Арсовска, откако првично велеше дека не е возможно да се заврши.

Арсовска ќе ги продолжи и другите проекти почнати од претходниот градоначалник, Петре Шилегов, како проширувањето на булеварот „Борис Трајковски“ од Пинтија кон Драчево, клучката кај Момин поток. Секако, ќе мора да се заврши и изградбата и реконструкцијата на фекалната канализација на булеварот „Киро Глигоров“.

„Ова се веќе склучени договори што мора да се реализираат“, вели Арсовска.

Исто така, продолжува и реконструкцијата на Универзална сала, иако се прави одредена измена на проектната документација, а се планира на пролет да биде завршена првата фаза. За втората фаза, која се однесува на уредување на внатрешноста на Универзалната сала, треба да се обезбедат средства, а градот е многу задолжен, рече Арсовска.