Арсовска ќе ги менува водоводните цевки на булевари кои годинава беа реконструирани?

Реконструкција и замена на дотраените водоводни цевки најави кандидатката за градоначалник Данела Арсовска, поддржана од опозициската ВМРО-ДПМНЕ, и тоа оние главните во Скопје, кои минуваат под неодамна реконструирани булевари. 

Имено, таа најави замена на водовосните цевки под „Партизанска“ и под булеварите „Словенија“ и „Босна и Херцеговина“. Проширувањето и реконструкцијата на  булеварите заврши годинава, во мај беше пуштен во употреба булеварот „Босна и Херцеговина“, а за булевар „Словенија“ најавена е изградба на клучка на крстосницата со Качанички пат, „Никола Карев“ и „Хасан Приштина“. 

Ако замена на старите водоводни цевки значи повторно раскопување на реконструирани булевари, покрај тоа што сообраќајниот проток ќе биде нарушен, повторно ќе се трошат пари за иста работа.

Оптимизација на водоснабдителниот систем со што ќе овозможи заштеда на електрична енергија, вода, контрола на притисокот на мрежата што предизвикува чести дефекти и загуби на вода во системот. Решавање на проблемот со водоводната мрежа е еден од приоритетите на Данела Арсовска за којшто дава брзо и сигурно решение.

„Стручен тим ќе изработи студија за утврдување на состојбата на двата главни магистрални метални цевководи, едниот кој е поставен по „Партизанска“ и другиот кој е поставен по булеварите „Словенечка“ и „Босна и Херцеговина“. Овие главни цевководи се изградени уште во 1967 година со метални цевки и имаат ограничено време на трајност. Затоа ќе инвестираме во реконструкција и замена на дотраените и нефункционални водоводни цевки на територија на Град Скопје. Тоа ќе биде приоритет за мене”, порача Арсовска на денешна конференција за медиуми.

Арсовска рече дека честите проблеми и прекини на водоснабдувањето во различни делови од градот треба да се решат, а упати прашање до моменталниот градоначалник зошто не се инвестира во нова водоводна и канализациона мрежа.

„Сакам да упатам јавно прашање до актуелниот градоначалник каде и на што се трошат парите на граѓаните, ако сите гледаме дека не се инвестира во нова водоводна и канализациона мрежа на градот”, потенцираше Арсовска.

Арсовска се осврна со конкретни решенија на проблемите и на останатите делови на Скопје, каде, како што кажа, во некои населени места во летниот период немаат вода и со недели.

„Ќе се изгради систем за водоснабдување на Ченто, Стајковци, Синѓелиќ, Инџиково и Хиподром. Исто така, од мостот во Маџари еден крак од водоводната мрежа по булеварот Александар Македонски, ќе продолжи до новата населба во Хиподром. Приоритет на Град Скопје ќе биде изградба на квалитетен систем за водоснабдување и во Љубанци, Љуботен, Раштак, Булачани, Виниче, Страчинци и Брњарци. Според програмата за модерно Скопје, која по 17 октомври ќе биде и програма на градот, ќе отпочне изградба на пумпна станица, потисен цевковод и резервоар, со што ќе се добие трајно решавање на проблемот со недоволен притисок во мрежата на Општина Ѓорче Петров. Скопје ќе биде град кој се грижи за сите граѓани подеднакво и ќе инвестираме во обезбедување на квалитетни услови за живот во секоја општина и населено место во градот, а инвестирање во реконструкција и замена на дотрајаните и нефункционални водоводни цевки на територија на Град Скопје ќе биде приоритет за мене”, додаде Арсовска.