Ангелов: Јапонски метод на македонски начин за спречување поројни поплави во Радовишко

Директорот на Центарот за управување со кризи (ЦУК) Стојанче Ангелов денеска со меѓународни високи претставници за кризен менџмент од Јапонија и од Балканот беше на теренска обиколка на планината Плачковица од rадовишка страна, над највисокото село Коџалија, соопштија од ЦУК.

Како што информираа оттаму, посетата е во рамки на завршниот регионален семинар „Проектот за градење на капацитети за екосистемски-базирано намалување на ризици од катастрофи „Eco-DRR“, поддржан од Агенцијата за меѓународна соработка на Јапонија – (ЈИЦА JICA), што се одржува во Скопје и се презентираа сите активности од проектот коишто беа имплементирани и на терен. Практично, се оствари теренска посета на проектната локација на подрачјето на Општина Радовиш, со цел да се согледа практичната примена на „Еко-ДРР“ и конкретните стратешки мерки на терен за намалување на ризикот од катастрофи – во случајот од поројни поплави.

-Конкретно, преку овој проект во Република Северна Македонија беа применети теоретски и практични мерки од концептот на екосистемски-базирано намалување на ризици од катастрофи (Eco-DRR), со крајна цел да се намали интензитетот и фреквентноста на природни непогоди, како што се поројните поплави, лизгање на земјиштето и ерозија на почвата, кои со децении наназад предизвикуваат големи физички штети, социоекономски последици и доведуваат до тешка деградација на природната средина, изјави Ангелов.

Тој посочи дека благодарение на заедничките интензивни активности на Центарот за управување со кризи, координирани од Стевко Стефаноски и одличната поддршка и соработка со JICA, од идната година во оваа Регионална програма ќе се приклучат Албанија и Босна и Херцеговина, а се надева дека и Република Србија ќе го стори истото, со што целиот регион ќе биде дел оваа ЈИЦА мрежа за соработка.