Албанија му одобри на зетот на Трамп да гради луксузен ресорт на остров

Владата на Албанија ѝ додели статус на стратешки инвеститор на компанија поврзана со зетот на Доналд Трамп, Џаред Кушнер, за да изгради луксузно одморалиште на ненаселен медитерански остров, кој некогаш беше воен пункт.

Комитетот за стратешки инвестиции на Албанија, предводен од премиерот Еди Рама, на 30 декември го прифати предлогот на Atlantic Incubation Partners LLC за проектот од 45 хектари на малиот остров Сазан, кој вклучува планирана инвестиција од 1,4 милијарди евра.

Во писмената одлука, видена од Ројтерс во четвртокот, комитетот рече дека проектот е во согласност со законодавството за стратешки инвестиции и за бројот на работни места што се бара со законодавството, велејќи дека ќе вработи околу 1.000 луѓе.

Според законот, доделувањето статус на стратешка инвестиција им овозможува на компаниите да спроведат инвестициски проект што се смета за стратешки како дел од стратешкиот сектор на економијата, како што е туризмот.

„Формата на учество на државата во оваа инвестиција ќе се реализира преку формирање на заедничко правно лице“, соопшти комитетот, додавајќи дека во него ќе биде вклучена и државната Албанска инвестициска корпорација, пишува Ројтерс.

Минатата година Кушнер ги објави плановите за изградба на туристичко одморалиште во Звернец во јужна Албанија, како дел од пошироката инвестиција на неговите „Афинитети партнери“ на Балканот, која го вклучува и проектот за Сазан, во близина на албанскиот брег, и проект во поранешен штаб на армијата во српската престолнина Белград.

Кушнер, кој служеше како врвен помошник на Трамп за време на првиот мандат на неговиот свекор како претседател на САД, ја основаше инвестициската фирма во 2021 година.

Проектите би можеле да ги поттикнат локалните економии со привлекување посетители, но компанијата се соочува со противење од критичарите кои велат дека ќе ѝ наштетат на животната средина или, во случајот со Белград, ќе ги загрозат локациите од културно значење.

Компанијата планира да инвестира околу 1,4 милијарди евра за изградба на комплекс од вили и хотели на 45 хектари земја на  островот Сазан, кој бил воена база во времето на Студената војна.

Неговиот „стратешки“ статус ќе му овозможи на проектот „да има корист од забрзаните процедури и други придобивки“. Потегот дојде откако Трамп треба да ја преземе функцијата в понеделник.

На Балканот, Кушнер минатата година ги објави плановите за инвестирање во недвижен имот во Србија. Некои критичари ги обвинија Кушнер и неговата сопруга Иванка Трамп дека го користат своето време во Белата куќа за да обезбедат деловни зделки со странство.  Албанската влада долго време се обидува да ја зајакне својата економија преку туризмот, што предизвика градежен бум долж големи делови од крајбрежјето на земјата.

Островот Сазан во минатото се користел исклучиво како воена база. Но, декретот потпишан во декември од претседателот Бајрам Бегај го отстрани од списокот на локации за распоредување и обука на вооружените сили на земјата.

Албанскиот премиер Еди Рама претходно изјави дека, од островот Сазан, инвестицијата на Кушнер, ќе направи „бисер на туризмот на Медитеранот“. Според него оние кои зборуваат за уништување на заштитени подрачја лажат, бидејќи, како што рече тој, Сазан никогаш не бил заштитено подрачје, освен за војниците на Енвер Хоџа.