Ахмети му напиша писмо на Мицкоски, го повикува на зрелост

Откако испрати писма до повеќе меѓународни претставници и шефови на држави, во кои изрази загриженост за непочитување на Охридскиот договор, лидерот на Демократската унија за интеграција (ДУИ), Али Ахмети, денеска такво слично писмо испратил и до премиерот и лидер на ВМРО-ДПМНЕ, Христијан Мицкоски.

 Во писмото партискиот лидер изразува загриженост за неодамнешните одлуки на Уставниот суд за „укинување на клучните механизми за заштита на заедниците“ и нивното влијание врз, како што се вели, меѓуетничката кохезија и одржливост на земјата. Ахмети предупредува дека во актуелната комплексна геополитичка состојба во светот и регионот, за која оцени дека е поопасна од кога било од крајот на минатиот век, секое ново нарушување на меѓуетничките односи би имало, како што вели, сериозни последици за внатрешната кохезија и предвидливост.

„Последните одлуки на Уставниот суд, кои изгледа дека се извршување на програмата на вашата партија за укинување на клучните механизми за заштита на заедниците, предизвикаа загриженост кај сите граѓани кои се посветени на градењето на подобро одржливи меѓуетнички односи во Северна Македонија. Одлуките за измена или ревизија на Законот за употреба на јазиците, кој е клучен елемент на Охридскиот договор, не се само политички контроверзни, туку и штетни за напредокот и соработката меѓу заедниците. Ова е развој што може да ги поткопа придобивките стекнати со значителен труд и да ја врати земјата во периоди на несигурност“, пишува Ахмети во писмото до Мицкоски.

Охридскиот договор, посочува лидерот на ДУИ, не е само политичко прашање, туку е темел на нашата мултиетничка демократија во земјата, стабилност и демократски напредок.

„Секој обид за негово доведување во прашање, особено во актуелниот контекст, е чекор што може да ја влоши состојбата во земјата и регионот. Затоа, ве повикувам да размислите со зрелост и одговорност за овие одлуки кои имаат потенцијал да ја нарушат мултиетничката кохезија во Северна Македонија. Иднината на нашата земја треба да се гради врз основа на соработка и взаемна почит, а не врз поделби. Секој чекор што ги нарушува овие основи е штетен за иднината на нашата земја и за сите нејзини граѓани, без разлика на етничката припадност“, се додава во писмото кое Ахмети го испратил до премиерот и лидер на ВМРО-ДПМНЕ.

Али Ахмети испратил писмо и до високи албански и меѓународни лидери, во кое ја изразува својата загриженост во врска со неодамнешните политички и уставни случувања во Македонија. Според ДУИ, писмата испратени од Ахмети се однесуваат на три неодамнешни одлуки: можното укинување на Законот за употреба на јазиците, забраната за етничка идентификација во државните институции (Балансерот) и формирање влада без правична етничка застапеност.

Ахмети, според ДУИ, изразил загриженост дека овие случувања „ги загрозуваат достигнувањата на Охридскиот договор и принципите на еднаквост и стабилност во мултиетничка држава“.

„Ахмети нагласува дека последните три одлуки претставуваат сериозна закана за мирот и стабилноста на земјата и на регионот во целина. Тој ги повикува меѓународните лидери на заедничка акција за заштита на достигнувањата на Охридскиот договор и правата на Албанците во Северна Македонија“, се вели во соопштението на ДУИ објавено на 27 октомври, пренесуваат дел од медиумите на албански јазик во земјава.

Меѓу лидерите до кои Ахмети испрати писмо се претседателот и премиерот на Албанија, Бајрам Бегај и Еди Рама, претседателката и премиерот на Косово, Вјоса Османи и Албин Курти, претседателката на Европската комисија, Урсула фон дер Лајен, германскиот канцелар Олаф Шолц, францускиот претседател Емануел Макрон и американскиот државен секретар Антони Блинкен.

Уставниот суд се очекува во декември да се произнесе за судбината на Законот за употреба на јазиците, кој беше донесен пред седум години. Премиерот Христијан Мицкоски бара да не се врши притисок врз Уставниот суд во однос на Законот за употреба на јазиците. Според него, не се оспорува целиот закон, туку само делот на судството.