Администрацијата на Трамп ја распушта работната група насочена кон руските олигарси

Американското Министерство за правда ги прекинува напорите, започнати по руската инвазија на Украина во 2022 година, за воведување санкции на олигарсите блиски до Кремљ.

Меморандумот од државниот обвинител Пем Бонди, вели дека работната група КлептоКепчар ќе прекине како дел од промената на фокусот кон борбата против нарко-картелите и меѓународните банди.

„Оваа политика бара фундаментална промена во размислувањето и пристапот“, напиша Бонди во директивата, додавајќи дека ресурсите што сега се наменети за спроведување санкции и запленување на имотот на олигарсите ќе бидат пренасочени кон спротивставување на картелите.

Напорите, започнати за време на администрацијата на демократскиот претседател Џо Бајден, имаа за цел да ги оптоварат финансиите на богатите соработници на рускиот претседател Владимир Путин и да ги казнат оние кои го олеснуваат избегнувањето на санкциите и кршењето на контролата на извозот.

Ова беше дел од поширокиот притисок да се изолира Русија од глобалните пазари и да се применат широки санкции наметнати на Москва поради меѓународната осуда на нејзината војна во Украина. Работната група ги обвини алуминиумскиот тајкун Олег Дерипаска и телевизискиот тајкун Константин Малофеев за наводно прекршување на санкциите и заплени јахти на санкционираните олигарси Сулејман Керимов и Виктор Векселберг.

Обвинителите назначени во работната група ќе се вратат на нивните претходни позиции. Промените ќе важат најмалку 90 денови.