Норвешка му возвраќа на Трамп за навредата „земја-нужник“ со реклами за живописни тоалети

Туристичката агенција „Visit Norway“ одговори со остар хумор на навредливите изјави на американскиот претседател Доналд Трамп, претворајќи го неговиот јавен испад во реклама што ги истакнува живописните јавни тоалети во земјата.

За време на говор во рамките на кампањата во Мичиген, Трамп упати погрдни зборови кон Норвешка, нарекувајќи ја „земја-нужник“. Тој додаде дека не сака норвешки имигранти да влегуваат во Соединетите Држави, поврзувајќи го своето незадоволство директно со гневот што сè уште не ја добил Нобеловата награда за мир.

Како одговор, туристичката агенција „Visit Norway“ објави иронична изјава, поигрувајќи си со фразата на американскиот претседател и истакнувајќи дека Норвешка навистина поседува некои од највпечатливите тоалети во светот. Во објавата беа прикажани фотографии од јавни тоалети со уникатна архитектура, сместени во драматични пејзажи со фјордови и на познати видиковци.

„Слушнавме некаква врева околу ’земја-нужник‘. Па, што да се каже – навистина имаме едни од најубавите тоалети во светот. Со љубов, Visit Norway“, соопштија од туристичката организација.

Во рекламата стои дека тоалетите долж норвешките туристички патишта се архитектонски ремек-дела.

„Сите, освен еден, се дизајнирани од познати или перспективни норвешки архитектонски студија. Објектот во Егум (Eggum) на Лофотенските острови е најмалиот дизајн, дело на меѓународно признатото студио „Снехета“ (Snøhetta), додека тоалетот во Селвика (Selvika), долж туристичкиот пат Хавојсунд (Havøysund), е потпишан од Реиулф Рамстад (Reiulf Ramstad).

Некои од нив се наоѓаат северно од Арктичкиот круг во Северна Норвешка, додека други се сместени покрај популарните фјордови на запад. Можете да наидете и на елегантни тоалети во оддалечени предели, на планинските висорамнини во регионот на фјордовите. Имајте предвид дека до многу од нив може да се стигне само во текот на летото, бидејќи некои патишта се затворени во зимскиот период.

Временските услови во тој дел од годината можат да бидат навистина сурови; на пример, во Оскарсхауг (Oscarshaug), долж туристичкиот пат Согнефјелет (Sognefjellet), морале дополнително да го зајакнат тоалетот со челична конструкција. Но, изгледа одлично.Речиси како викиншки шлем.

Како што можете да забележите, норвешката колекција на спектакуларни тоалети изобилува со одлични примери за тоа како нешто толку банално, како што е тоалетот, може да се претвори во туристичка атракција. За развојот на норвешките туристички патишта и придружните објекти е задолжена Норвешката управа за јавни патишта, а тие сè уште имаат неколку адути во ракавот. На пример, откриваат дека веќе работат на тоалет инспириран од шумата, за чија изградба е искористено суво дрво од околу 60 до 70 стебла. Кога ќе биде завршен, објектот ќе изгледа како превртен дрвен трупец, чии корени го држат покривот. 

Сепак, пред да почнете да планирате патување со застанувања кај овие стилски тоалети, запомнете го следново: не бидете „онаа“ личност. Знаете, онаа што остава неред зад себе и го расипува доживувањето за другите“, стои во објавата инспирирана од Трамп.

Истовремено, норвешкиот министер за надворешни работи, Еспен Барт Ајде, потсети дека норвешкиот Нобелов комитет функционира со целосна институционална независност од националната влада.

„Тој одлично знае дека Нобеловиот комитет е независен. Го потсетивме на тоа – и тоа останува непроменето“, изјави Ајде.

И покрај јавните тврдења дека решил осум меѓународни конфликти, Трамп не успеа да стави крај на војната во Украина – нешто што, како што е познато, вети дека ќе го реши уште првиот ден од својот мандат. Понатаму, американскиот лидер започна воена кампања против Иран која трае повеќе од седум месеци, што доведе до рекордно високи цени на енергенсите на меѓународниот пазар. Страните во неколку конфликти, за кои Трамп тврдеше дека ги решил, целосно ја отфрлија дипломатската улога на американскиот претседател, додека непријателствата повторно се разгореа во повеќе региони, вклучително и во Демократска Република Конго, како и долж границата меѓу Камбоџа и Тајланд.

Трамп во повеќе наврати изјави дека ја заслужува Нобеловата награда за мир. Во октомври минатата година, пред официјалното објавување на добитниците, Трамп изјави дека тоа што нема да му биде доделена наградата би претставувало „навредa“ за Соединетите Држави.

„Visit Norway“ е официјалниот туристички портал на Кралството Норвешка и главниот институционален промотивен канал преку кој земјата се претставува како меѓународна дестинација.