Не успеа да се врати дома – почина Марија дел Кармен, жената за чиј дом се бореа стотици луѓе

Марија дел Кармен Абаскал, 87-годишната жена од Мадрид чиј случај ги обедини соседите, активистите и илјадници граѓани во борбата против иселувањето, почина во болницата „Грегорио Марањон“.

Таа неколку дена беше хоспитализирана откако на 23 септември беше иселена од станот во кој живеела 71 година.

Нејзината приказна стана симбол на борбата за правото на дом. Марија дел Кармен живеела во станот во мадридскиот кварт Ретиро од 1956 година, кога нејзиниот татко го изнајмил. Таа во него го поминала речиси целиот живот, а по пензионирањето продолжила да живее сама во домот во кој биле собрани нејзините семејни фотографии, книги, слики и предмети што ги чувала со децении.

Проблемите започнале откако зградата била купена од компанијата „Urbagestión“. Станот бил под стар договор за закуп, а компанијата сметала дека договорот е истечен. По повеќегодишен судски спор, биле направени четири обиди за иселување. Првите три биле одложени, но четвртиот, на 23 септември, бил спроведен.

Марија дел Кармен тогаш беше изнесена од станот на носилка и пренесена во болница. Пред зградата во тој момент биле собрани десетици активисти и соседи кои се обидувале да го спречат иселувањето.

Нејзината состојба веќе била нарушена. Во последните години се движела со инвалидска количка и имала признаена 50-процентна попреченост. По иселувањето била хоспитализирана, а од болничкиот кревет продолжила да им се обраќа на луѓето кои ја поддржуваа.

Нејзиниот случај во меѓувреме прерасна во национално движење. Во Мадрид и други шпански градови беа организирани протести, а на Пуерта дел Сол започна и протестна кампaња за правото на домување. Случајот на Марикармен стана симбол на пошироката криза со домувањето во Шпанија.

Нејзините правни застапници и компанијата сопственик постигнаа договор со посредство на мадридската општина. Марија дел Кармен требало да добие нов договор за закуп во траење од осум години, а месечната кирија да не надминува 30 проценти од нејзините нето приходи.

Така, по речиси осум години правна битка, се отвори можноста да се врати во станот во кој го поминала речиси целиот живот. Но Марија дел Кармен не успеа да се врати дома. Таа почина на 7 октомври во болницата „Грегорио Марањон“, само две недели по иселувањето. Веста ја потврди Синдикатот на станари на Мадрид, кој соопшти дека договорот што требало да ѝ овозможи враќање бил постигнат предоцна.

Во последните денови од болницата таа продолжила да им испраќа пораки на луѓето кои протестираа за неа. Од болничкиот кревет ги повикувала да продолжат со борбата за правото на дом и да се грижат едни за други.

Нејзината адвокатка Беатриз Дуро по нејзината смрт изјавила дека смета оти зад трагичниот исход постојат одговорности и дека, доколку иселувањето било прекинато, Марија дел Кармен можела да биде жива.

Она што останува по Марија дел Кармен е приказна која одамна престана да биде само приказна за една жена и нејзиниот дом. Таа покажа колку е ранлив човекот кога домот, во кој поминал речиси цел живот, одеднаш ќе стане недостижен. Истовремено, ни покажа дека една лична борба може да прерасне во национална дебата.

Марија дел Кармен не успеа да се врати во својот дом. Но нејзиниот случај веќе стана симбол на борбата за луѓето да имаат право да останат во домовите во кои го поминале својот живот.

Шпанците на нозе по присилното иселување на старица од стан: Немири на улиците