Трамп ги пофали односите со Кина на вечерата во Белата куќа во чест на Шји

Американскиот претседател Доналд Трамп ги пофали односите меѓу Кина и САД на државничката вечера во Белата куќа со која беше заокружен вториот ден од посетата на кинескиот претседател Шји Џјинпинг.

– Претседателот Шји и јас разбираме дека претставуваме различни системи, но врските меѓу нашите народи траат и никогаш не сме се сложувале подобро – рече Трамп.

Тој ги пофали Шји и неговата сопруга Пенг Лијуан како „навистина извонредни, неверојатни луѓе“ и им подари статуа од белоглав орел, официјалниот национален симбол на САД.

– Заедно можеме да продолжиме да градиме однос што промовира просперитет и безбедност за идните генерации – рече Трамп.

Шји од своја страна им се заблагодари на Трамп и неговата сопруга Меланија за нивното „љубезно гостопримство“ за време на посетата.

Тој рече дека разговорите меѓу двете земји довеле до „заедничко разбирање“ за многу прашања и „нова стратешка насока“ за односите меѓу Кина и САД.

– Кина и САД мора да дејствуваат како одговорни големи земји, да ги исполнат очекувањата на нашите народи, да чекорат во чекор со трендовите на нашето време и да истражат нов пристап за големите земји да се сложуваат една со друга – рече Шји.

– Како река која никогаш не престанува да тече, историјата никогаш не стои во место … заедно да напишеме ново поглавје во нашите пријателски односи – додаде тој.

Претходно Трамп и Шји ја нагласија потребата од поголема комуникација и соработка меѓу двете најголеми економии во светот.

Шји покани 100.000 американски државјани да студираат во Кина, додека Пекинг се подготвува да ја продолжи својата панда-дипломатија со испраќање две панди во американска зоолошка градина како знак на пријателство.

Трамп најави дека ќе бидат донесени „одлуки“ за клучни прашања како што се „безбедноста, технологијата и суперинтелигенцијата“, новиот термин кој американскиот претседател го употребува за вештачка интелигенција и претставува клучна арена за натпревар меѓу двете земји.

– Одлуките што ги носиме во овие области денес можат да промовираат мир и просперитет во децениите што следат – рече Трамп.

Според писменото обраќање објавено од официјалната кинеска новинска агенција Синхуа Шји изјави дека САД и Кина треба да бидат партнери, а не ривали.

Тој рече дека ова е клучна година за односите меѓу двете земји, додавајќи дека тие треба да поттикнуваат стабилни односи карактеризирани со соработка, умерена конкуренција, надминливи разлики и изгледи за мир.

Шји последен пат ги посети САД во 2023 година, кога отпатува во Калифорнија за економскиот самит АПЕК и се сретна со претходникот на Трамп, Џо Бајден.

Ова е негово прво патување во Белата куќа од 2015 година, за време на претседателството на Барак Обама, иако кинескиот претседател го посети ресортот на Трамп, Мар-а-Лаго во Флорида во 2017 година.

Трамп го покани Шји во Белата куќа за време на својата посета на Пекинг во средината на мај.

На почетокот на посетата американскиот министер за финансии Бесент доцна во средата најави двомесечно продолжување на трговското примирје меѓу двете суперсили.

Бесент за Фокс Њуз изјави дека трговското примирје меѓу двете земји е продолжено откако тој и кинескиот вицепремиер Хе Лифенг одржаа ненајавен состанок во Вашингтон.