Гугл гради голем дата центар во Австрија

Работата на првиот центар за податоци на Гугл во Австрија почна во април, а првата фаза треба да биде оперативна во 2027 година. Американската компанија наведува дека центарот ќе одговори на растечката побарувачка за cloud услуги и вештачка интелигенција. Треба да се простира на 50 хектари во градот Кронсторф каде живеат околу 3.500 жители. 

Тие најавуваат отворање сто директни и неколку илјади индиректни работни места и придонес кон локалните иницијативи за одржливост и зајакнување на дигиталната инфраструктура на Австрија. На церемонијата на поставување камен-темелник, гувернерот на Горна Австрија, Томас Штелцер, рече дека центарот ќе испрати „силен сигнал за Горна Австрија како локација за бизнис и иновации“.

Гугл тврди дека нивните центри за податоци се меѓу енергетски најефикасните во светот. Критичарите, од друга страна, истакнуваат дека дури и многу ефикасните постројки можат да трошат огромни количини електрична енергија и вода.

Европа веќе има стотици центри за податоци, иако далеку заостанува зад САД во однос на капацитетот.