Американската војска соопшти дека уништила пет ирански танкери како одмазда

Американската војска погоди пет ирански танкери за сурова нафта, наведувајќи дека тоа е одговор на ракетите што Исламската револуционерна гарда (ИРГЦ) ги лансираше кон американски воен брод двапати во последните два дена.

„Американскиот воен брод успешно ги избегна обидите за ирански напади и продолжи да патролира во регионалните води. Ниту еден американски припадник не беше повреден“, соопшти регионалната команда Центком.

Како одговор на иранските напади, Центком „уништи“ четири танкери за сурова нафта во Оманскиот Залив и еден петти во близина на островот Харг.

„Американските сили им наложија на екипажите да ги напуштат бродовите пред пловила да бидат погодени и онеспособени за работа“, информира Центком.

Танкерите беа „дел од мрежа во сенка вредна милијарди долари која ја финансира ИРГЦ и нејзините регионални застапници“, соопшти командата.

Еден од танкерите во меѓувреме потона, соопшти Центком во ново известување. Видеоснимка покажа како бродот е погоден, како се запалува и тоне со предниот дел.

Јордан во меѓувреме соопшти дека пресретнал нови напади од Иран откако Техеран најави нови напади врз американските воени бази во регионот. Јордан пресретна и уништи 18 балистички ракети испукани од Иран, додека две други паднаа во оддалечени области, објави државната новинска агенција Петра. Не се пријавени повредени.

Иранската ИРГЦ соопшти дека нејзина цел била американската воена база Ал-Азрак во знак на одмазда за претходните американски напади врз танкери за нафта, јави новинската агенција Фарс.

Според иранската новинска агенција Тасним, се случиле неколку експлозии во две американски бази во Јордан. Нема потврда за извештаите ниту од американската војска ниту од јорданските власти.

Претходно, иранските медиуми јавија за неколку експлозии на островот Харг и во близина на пристанишниот град Џаск на Ормуската Теснина.

Експлозии се слушнале во неколку делови на Харг, вклучувајќи го и подрачјето на пристаништето, објави владината новинска агенција Мехр. Експлозии исто така се слушнале и во близина на пристанишниот град Џаск во југоисточен Иран на Ормуската теснина, јави новинската агенција Фарс.

Харг е најважниот терминал за извоз на нафта во Иран, при што голем дел од производството на нафта во земјата се испорачува тргнувајќи од овој остров. Поради своето стратешко значење, Харг беше повеќепати цел на напади за време на Ирачко-иранската војна од 1980 до 1988 година.

Ормуската Теснина е клучна точка во војната меѓу Вашингтон и Техеран.

Иран продолжува во најголем дел да го попречува морскиот сообраќај низ протокот со закани и напади врз бродови. Водениот пат, кој беше отворен за пловидба пред војната, е од глобално значење за транспортот на нафта, природен гас и ѓубрива.

САД се обидуваат да го зголемат притисокот врз Техеран преку поморска блокада на иранските пристаништа. Двете страни повеќепати разменија оган во изминатите недели.