Захарова: Москва адекватно ќе одговори на протерувањето руски дипломати


Москва адекватно ќе одговори на одлуките на Вашингтон и повеќе западни земји за протерувањето руски дипломати, изјави денеска портпаролката на руското Министерство за надворешни работи Марија Захарова.

Таа додаде дека тоа се однесува на протерувањето на руските дипломати и затворањето на Конзулатот на Русија во Сиетл.

– Адекватен одговор ќе биде даден на сите чекори на САД и на ЕУ, кои ги видовме, рече Захарова.

Поради „Случајот Скрипал“ првенствено од Велика Британија беа протерани 23 руски дипломати, а во знак на солидарност со Велика Британија, САД, Австралија, Канада, 17 земји-членки на Европска унија, како и Украина, Норвешка, Албанија и Македонија протеруваат руски дипломати.

Но, низа држави не се приклучија на глобалната координирана акција на протерување на руски дипломати.

– Спроведовме проверки во Нов Зеланд. Немаме непотврдени официјални претставници на руската разузнавачка служба. Ако имавме, ќе ги протеравме, изјави премиерката на Нов Зеланд, Џасинда Арднер.

Таа изрази принципиелна поддршка за Велика Британија и додаде дека нејзината Влада ќе продолжи да размислува за мерки кои може да ги преземе за да ја поддржи меѓународната заедница.

Словенија, исто така не е меѓу земјите кои ќе протераат руски дипломати. Словенечкиот министер за надворешни работи Карл Ерјавец изјави дека официјална Љубљана не донела одлука за протерување на руски дипломат и оти тоа нема да го направи се додека не се докаже што всушност се случило при инцидентот во Солсбери.

– Се уште е прерано за одговор како Словенија ќе постапи во врска со овој случај. Ние се придржуваме на ставот прифатен на неодамнешниот состанок на Европскиот совет дека е потребно да се утврди што точно се случило, изјави Ерјавец.

Бугарското Министерство за надворешни работи соопшти дека земјата не планира да протерува руски дипломати откако тоа го сторија поголемиот дел од европските земји.

Ниту Белгија засега не презема никакви „мерки за солидарност“ со Велика Британија. За таквиот став се уште нема потврда од белгиското Министерство за надворешни работи.

Мерката, засега, нема да ја поддржи ниту Австрија, која соопшти дека сака да го одржи „дијалогот со Москва отворен“.

Црна Гора се уште не го соопшти ставот дали ќе се придружи на акцијата, но засега нема таква најава.

Словачка остро го осуди настанот и го повика на разговор рускиот амбасадор во Братислава, но засега нема да протерува руски дипломати.

Кипар, исто така, информираше дека нема да се придружи на координираната акција на западните земји.

Во групата земји кои нема да протераат руски дипломати се и Грција и Португалија.

И турскиот вицепремиер Бекир Боздаг изјави дека Анкара не планира да протерува руски дипломати поради „Случајот Скрипал“.

Поранешниот двоен шпион Сергеј Скрипал и неговата ќерка Јулија на 4 март беа нападнати со нервен гас во Солсбери. Нивната состојба е и понатаму критична.