ДПА: Германија и натаму продава оружје на Турција


Дури и по спорната воена интервенција во Северна Сирија за да го исчисти регионот од курдската милиција, Германија продолжува да продава оружје на Турција во вредност од милиони евра, јави ДПА.

Во првите речиси 40 дена од почетокот на турската операција „Маслиново гранче“ против курдските Сили за заштита на народот во Африн биле одобрени 20 дозволи за продажба на оружје во вредност од 4,4 милиони евра. Бројката е многу поголема од истиот период во 2017 година, кога се издадени 14 дозволи со просечна вредност од 3,6 милиони евра.

Податоците ги достави германското Министерство за економија како одговор на пратеничко прашање.

Претходниот министер за надворешни работи Зигмар Габриел, кој вчера беше заменет од досегашниот министер за правда Хајко Маас, вети дека извозот на оружје за Турција ќе биде целосно запрен заради операцијата во Сирија.