Девет лица се повредени викендов во сообраќајки во Скопје


Девет лица биле полесно повредени во пет од вкупно 22 сообраќајки регистрирани во текот на изминатите три дена на подрачјето на СВР Скопје. Во 17 сообраќајни несреќи била причинета материјална штета, информираат од Министерството за внатрешни работи (МВР).

Сообраќајната полиција викендов открила и санкционирала поголем број прекршоци. Сто возачи се движеле со брзина поголема од дозволената, четворица поминале на крстосница на црвено светло, пет возачи не дале првенство на минување и 28 лица кои го управувале возилото нерегистрирано.

Од сообраќај биле исклучени 38 лица: 14 возачи кои го управувале возилото под дејство на алкохол, 21 лице пред да се стекнат со право на управување на патничко моторно возило и тројца возачи почетници. Санкционирани биле и пет пешаци кои поминале коловоз вон пешачки премин. Затекнати биле 195 непрописно паркирани возила.

Со помош на специјалното возило пајак, отстранети биле 178 возила.

Одделението за превенција денеска ќе реализира едукативна работилница на тема „Сообраќајна култура на децата во предучилишните установи“ во приватната градинка JSP-International Play School” која се наоѓа на подрачјето на општина Карпош.