Автобусот минал технички пред еден месец

Надлежниот јавен обвинител од Основното јавно обвинителство Скопје, заедно со увидни екипи на Министерството за внатрешни работи, денеска во 13:15 часот го заврши увидот на лице место на тешката сообраќајна несреќа што се случи вчера на патниот правец Скопје – Тетово, во која 14 лица го загубија животот, а повеќемина се повредени.
Од Јавното обвинителство информираат дека интензивно се работи на утврдување на сите детали што можат да ги откријат причините за несреќата. Со оглед на тежината на самиот настан и обемот на истражни дејствија што ќе се преземат во претходна постапка во постапувањето по овој предмет е вклучен и втор јавен обвинител од Основното јавно обвинителство Скопје.
-Автобусот на компанијата „Дурмо турс“ што преминувајќи преку двете сообраќајни ленти излета од автопатот и се преврте во близина на стариот пат, е кренат од местото на несреќата и по наредба на јавниот обвинител врз него ќе се врши детално техничко вештачење од страна на Mашинскиот факултет во Скопје. Заради правилно утврдување на фактите, денеска на местото на несреќата беше присутна и екипа на Mашинскиот факултет која ги направи првите проверки на исправноста на возилото. Од досегашните сознанија утврдено е дека автобусот бил набавен во 2001 година, а последен пат бил регистриран во јануари 2019 година. По наредба на јавниот обвинител, Машинскиот факултет ќе изготви писмен вешт наод и мислење, соопшти Обвинителството.
На лице место со јавниот обвинител денеска била присутна и екипа на Бирото за судски вештачења, од каде треба да биде изготвен писмен вешт наод и мислење за причините на сообраќајната незгода.

Надлежниот јавен обвинител ќе ја побара целокупната документација од компанијата „Дурмо турс“ во врска со дозволите за јавен превоз кои ги поседува, одржувањето на возилата, бројот на патници и продадени карти во автобусот кој сообраќал на релацијата Скопје-Тетово, како и податоци во врска со работното време и релациите кои ги поминал возачот на критичниот ден.