Продадени резиденцијата и амбасадата на СФРЈ во Токио, Македонија добива 1,2 милион евра

Во рамки на сукцесијата, после станот на Тито на Менхетн, продадени се и амбасадата и резиденцијата на некогашна СФРЈ во Токио за 14,7 милиони евра.

Согласно Договорот за прашањата на сукцесија, Македонија би требало да добие 8 отсто од таа сума или речиси 1,2 милион евра, кое на сметка би требало „да легнат“ до почетокот на мај. Договорот за купопродажба бил склучен на 31 јануари, јави денеска весникот „Вечерње новости“.

Недвижноста во Токио има 1.726 квадратни метри и се простира на 938 квадрати земјиште.

„Новости“ наведува дека продолжуваат активностите за продажба на трите преостанати објекти – зградата во која во моментов е сместена српската мисија на ОН во Њујорк и амбасадите во Берн и Бон. За сите три објекти веќе постојат конкретни понуди.