Зетот на Ердоган поднесе оставка на министерската функција

Тој беше министер речиси пет години. Сега веќе не може да ја извршува функцијата во ресорот за финансии поради здравствени проблеми, изјави Берат Албајрак, зет на турскиот претседател Реџеп Таип Ердоган

Зетот на турскиот претседател Реџеп Таип Ердоган поднесе оставка на местото министер за финансии поради здравствени причини.

.„Откако речиси 5 години бев на министерски функции, донесов одлука да не продолжам со службата (како министер за финансии) поради здравствени причини“, напиша Берат Албајрак во порака на Инстаграм.

42-годишниот Албајрак  на функцијата министер за финансии е од јули 2018 година, а претходно 3 години беше министер за енергетика.

Сепак, според некои аналитичари прашање е дали само здравствените причини се причина за ваквата одлука. Имено оставката на Албарјак следувапо смената на гувернерот на турската Централна банка, Мурат Ујсал, кого го замени поранешниот министер за финансии Наџи Агбал.

Факт е: турската лира драматично загуби на вредност во изминатите неколку месеци. Во петокот вечерта 8,52 турски лири се тргуваа за еден долар.

Од почетокот на годинава, турската валута загуби речиси 30 проценти од вредноста во однос на американскиот долар.

Некои аналитичари пак споменуваат дека сега веќе поранешниот министер имал добри односи со Џаред Кушнер советникот на американскиот претседател Доналд Трамп.

Се додава оти тие односи за Ердоган повеќе не се важни бидејќи Трамп загуби на претседателските избори.Албајрак е инаку оженет со ќерката на Ердоган, Есра, и имат 4 деца. (Дојче веле)