Зеленски: Имам план за победа. Ќе ја принудам Русија да ја прекине војната

Американскиот претседател Џо Бајден навести дека Вашингтон би можел да ги укине ограничувањата за употребата на американски ракети со долг дострел од страна на Украина против цели на руска територија.

Ако тоа се случи, ќе ги исполни повеќемесечните барања на Украина за ублажување на ограничувањата за оружје на САД, за кои украинските лидери велат дека ги забавуваат во нивната одбрана од руската инвазија. Украинскиот претседател Володимир Зеленски постојано го повикува Западот да им дозволи на неговите сили да користат западно оружје со долг дострел за да ја нападнат Русија.

Американскиот шеф на дипломатијата Ентони Блинкен денеска е во Киев, а се поставува прашањето дали оваа клучна одлука ќе биде соопштена при неговата посета. Британскиот министер за надворешни работи Дејвид Лами е со Блинкен и заедно ќе одржуваат важни состаноци со Украинците.

Зеленски објави „план за победа“
Украинскиот претседател Володимир Зеленски рече дека има „план за победа“ да му го претстави на американскиот претседател Џо Бајден подоцна овој месец. Планот, вели тој, ќе ја принуди Русија дипломатски да ја заврши војната. Украинскиот лидер рече дека планот ќе дејствува за зајакнување на Киев и ќе има „психолошко“ влијание врз Москва, но не даде дополнителни детали.

Тој додаде дека планот ќе треба да им биде претставен на украинските сојузници пред вториот меѓународен мировен самит што сака да го одржи подоцна оваа година. „Доколку партнерите го поддржат планот, на Украина ќе ѝ биде полесно да ја принуди Русија да ја прекине војната“, рече тој.

„За што е овој план? Тоа е сериозно зајакнување на Украина и, според мене, ќе има и психолошко и политичко влијание врз одлуката на Русија да стави крај на оваа војна“, рече Зеленски.

Подготовката на тој план Зеленски веќе ја спомена на прес-конференција на крајот на август, без да навлегува во детали. Тогаш тој само рече дека упадот на Украина во руската област Курск на почетокот на август е дел од тој план, со надеж дека Украина на тој начин ќе добие посилна позиција за евентуални мировни преговори со Москва. Републиканците се длабоко поделени околу Украина и изборниот успех на Доналд Трамп може радикално да ја промени американската надворешна политика. Соработниците на Трамп навестија дека, доколку победи, тие ќе користат помош за да го принудат Киев да направи територијални отстапки кон Русија за да ја запре војната.

Зеленски ги повика Обединетото Кралство и САД да донесат „силни одлуки“, мислејќи на дозволата за употреба на оружје со долг дострел длабоко во Русија. „Малку подоцна ќе разговарам со Блинкен и со министерот за надворешни работи на Велика Британија. Не ги знам сите детали од нашиот разговор. Ќе бидам отворен и искрен“, рече тој.

Остра реакција на Русија
Кремљ реагираше на можноста САД денеска да дадат дозвола за далечинско гаѓање цели во Русија. Тој најави „соодветен одговор“ на Русија доколку САД и дозволат на Украина да удри длабоко во Русија со ракетните системи АТАКМС.

Портпаролот на Кремљ, Дмитриј Песков, изјави за новинарите дека се чини дека Вашингтон веќе одлучил да и дозволи на Украина да користи оружје за далечни напади во Русија.

Претседателот на долниот дом на рускиот парламент, Вјачеслав Володин, во средата изјави дека Москва ќе ги смета САД и нивните сојузници за завојувани страни доколку му дозволат на Киев да користи оружје со долг дострел.

Русија вели дека би можела да „здружи потенцијал“ со Кина доколку се соочи со агресија
Русија и Кина би можеле да ги „здружат своите потенцијали“ доколку се соочат со агресија, изјави портпаролката на руското Министерство за надворешни работи, Марија Захарова. На неделниот брифинг со новинарите, Захарова беше прашана за можното распоредување на американски ракети во Јапонија. Беше објавено дека САД изразиле интерес за распоредување на ракетниот систем со среден дострел Тајфон во Јапонија за време на заеднички воени вежби.

„Сакам да ве потсетам дека Москва и Пекинг на „двојното задржување“ на САД ќе одговорат со „двојна контрамерка“, рече Захарова.„Јасно е дека и Русија и Кина ќе реагираат на појавата на дополнителни и многу значајни ракетни закани, а нивната реакција ќе биде далеку од политичка, како што двете земји исто така постојано потврдуваат. Нашите односи не се насочени против трети земји. Ова е одбранбена позиција, ова не е иницијатива за таргетирање на други земји, но ако против нас се спроведува агресивна политика на напад од еден центар, зошто да не ги комбинираме нашите потенцијали и соодветно да одговориме? – изјави Захарова.