Зеленски до Русите: Без гас или без вас?
„Без вас или без гас? Ќе избереме без вас.„
Вака претседателот Володимир Зеленски им напиша на Русите на Телеграм по ракетните напади на Русија врз неколку електрани и енергетската мрежа на Украина во неделата. Снабдувањето со електрична енергија и вода беше прекинато во повеќе области. Според него и многу аналитичари, ова е одмазда за успешната офанзива на украинската армија источно од Харков. Еве што друго рече Зеленски:
-Дури и низ непробојната темнина, Украина и цивилизираниот свет јасно ги гледаат овие терористички акти. Намерни и цинични ракетни напади врз цивилната критична инфраструктура. Не врз воени објекти. (…)
Дали сеуште мислите дека сме „еден народ“? Дали се уште мислите дека можете да не исплашите, да не скршите, да не натерате да правиме отстапки? Дали навистина ништо не разбравте? Не разбирате кои сме ние? За што сме ние? За што зборуваме?
Читајте ми од усните:
Без гас или без вас? Без вас.
Без светлина или без вас? Без вас.
Без вода или без вас? Без вас.
Без храна или без вас? Без вас.
Студот, гладот, темнината и жедта не ни се толку страшни и смртоносни како вашето „пријателство и братство“. Но, историјата ќе стави сè на свое место. И ќе имаме гас, светлина, вода и храна… и БЕЗ вас!