Зелен хуман град: Принудени сме да формираме политичка партија, Собранието го урива Уставот!

ЗЕЛЕН ХУМАН ГРАД утре ќе најави дека ќе ја формира првата партија во Македонија составена од активисти кои со години волонтирале за општо добро во сферите заштита на животна средина и заштита на животните . Според нив, партијата ќе  претставува само техничко средство за нивно излегување на изборите, поради обидот на етаблираните политички партии во државата тоа да им го отежнат што повеќе.

-Принудени сме на овој чекор бидејќи власта и опозицијата во Собранието здружено одлучија да го срушат Уставот, да ја игнорираат одлуката на Уставниот суд од 20 мај 2025 година  и ,не само што предложија измени на Изборниот законик  што се противуставни и спротивни на препораките на ОБСЕ и ОДИХР и Венецијанската комисија, на едвај две недели пред распишување на изборите не постои никаков закон, а со тоа и никаква можност да се кандидираме на претстојните избори како независни кандидати.

Оваа изборна година е прва кога е целосно забрането учество на независните на избори
што е досега невиден антидемократски преседан во историјата на независна Македонија, порачаа од ЗЕЛЕН ХУМАН ГРАД.

Зад нивната позиција застана и политичката партија ДОМ која порача дека актуелните партии со една рака делат милиони за невладините, а со друга ги блокираат граѓаните во нивната независна политичка вклученост.

-Демократска обнова на Македонија (ДОМ) остро се спротивставува на сè поопасната пракса на владејачкото мнозинство, но и на опозицијата (партиите-коалиционери од поранешната влада), кои со едната рака доделуваат милиони евра за невладини организации, а со другата рака ги блокираат демократските механизми што би им овозможиле на граѓаните реално политичко учество. Со усвојувањето на Ребалансот на Буџетот за 2025 година, беа зголемени трансферите кон невладиниот сектор од 26,7 на 34,4 милиони евра, а во исто време нема никаква политичка волја за измена на Изборниот законик што би овозможил учество на независни кандидати на претстојните локални избори.

Поддршката за граѓанските организации е важна и потребна, но добива сенка на партиска инструментализација кога се користи како параван за прикривање на партиципативната демократија. Во исто време кога се зголемуваат средствата за невладиниот сектор, граѓаните и граѓанките системски се блокирани да учествуваат како независни политички субјекти. Згора на тоа: кои се механизмите за надзор над потенцијалната злоупотреба на овие средства зголемени за 30% на три недели пред објавувањето на локалните избори? Дали веќе се знае кои невладини (нечии миленици) ќе ги добијат тие средства? Зелената партија ДОМ остро се спротивставува на оваа пракса, каде со една рака се делат милиони, а со другата се бришат граѓаните од картата на политичка партиципација, стои во реакцијата на ДОМ.

ДОМ уште еднаш упатува јавно барање веднаш да се отпочне постапка за измена на Изборниот законик и да се обезбеди еднаква, фер и демократска можност за учество на независни и граѓански листи на локалните избори во 2025 година.

-И да не се лажеме: партиските мастадонти ќе си формираат свои прокси политички субјекти воочи локалните избори и ќе си „туркаат“ со своите миленици – и од тие причини веќе знаеме кој ќе биде одговорот на нашето барање…за жал!- констатираа од ДОМ.