Заев: Јас лично, но и Владата очекуваме банките да ги намалат каматите

Владата се обратила до Банкарската асоцијација со барање банките да ги намалат каматите, изјави вечерва лидерот на СДСМ, Зоран Заев, во интервју за Канал 5.

„Ние бараме таквата камата да биде намалена. Јавно кажувам дека Владата се обрати до банките со вакво барање, затоа што Народната банка ја намали задолжителната резерва која беше трошок за банките. Сега банките имаат помал трошок и тој помал трошок да го распоредат и кон клиентите. Јас лично, но и Владата очекуваме банките да ги намалат каматите за тие три месеци додека се одложени кредитите. Имаат простор каматите да ги намалат за онолку колку што им е намален трошокот“, рече Заев.

Тој исто така рече дека пред владата постои можноста да донесе Уредба и да им наложи на банките, главницата и каматата да ја одложат најмалку три месеци.

„Но, граѓаните треба да знаат дека банките ги даваат кредитите од штедните влогови на други граѓани и дека за тие штедни влогови исплаќаат камати. Ако не исплаќаат камати, граѓаните ќе ги повлечат штедните влогови и ќе се сруши банкарскиот систем. Затоа им е оставено на банките да одлучуваат. И секаде, и во Србија, Хрватска, Црна Гора, каматите се пресметуваат додека трае одлагањето“, истакна Заев.