За правда, родителите на оние кои ги загубија животите во „Пулс“ денеска го блокираа кружниот тек во центарот на Кочани

Со болка, револт и барања за правда, родителите на младите кои трагично ги загубија животите во пожарот во ноќниот клуб „Пулс“ денеска го блокираа кружниот тек во центарот на Кочани.

Протестот започна околу пладне, кога десетици граѓани им се придружија на семејствата на жртвите, изразувајќи поддршка за нивната борба против, како што велат, „неправдата и бавноста на институциите“. Родителите носеа фотографии од своите деца и транспаренти со пораки „Правда за нашите ангели“ и „Не заборавајте дека болката нема рок“.

„Поминаа месеци, а ние сè уште не добивме одговори. Никој не презема одговорност, никој не одговара за тоа што се случи. Нашите деца не смеат да бидат само бројка во статистика,“ изјави еден од родителите.

Блокадата траеше околу еден час, по што демонстрантите мирно се разотидоа, но најавија дека протестите ќе продолжат доколку не се преземат конкретни чекори во истрагата и судската постапка.

Граѓаните на Кочани уште еднаш покажаа солидарност, а атмосферата, иако мирна, беше исполнета со тага и гнев.