Вучиќ свика итна седница на Советот за национална безбедност; Уапсен поранешен министер

Српскиот претседател Александар Вучиќ свика итна седница на Советот за национална безбедност за утре, потврди Претседателството за Танјуг.

Седницата ќе се одржи во 12 часот. Некои медиуми објавија дека е во тек масовен обид за државен удар, кој го спроведуваат по наредба на Европа специјалниот обвинител на Јавното обвинителство за организиран криминал Младен Ненадиќ, јавната обвинителка на Јавното обвинителство за организиран криминал Јасмина Ганиќ, дел од полицијата од УКП и СБПОК.

Исто така, се наведува дека поранешниот министер Томислав Момировиќ е уапсен утрово во врска со обидот за државен удар.

Поранешниот српски министер и доверлив човек на Вучиќ, Томислав Момировиќ, и други се уапсени под сомнение за корупција во проектот за модернизација на железницата Нови Сад – Суботица – унгарска граница, потврди Обвинителството за организиран криминал (TOK).

Според соопштението, постои сомневање дека државниот буџет е оштетен за околу 115 милиони долари, додека кинескиот конзорциум CRIC&CCCC наводно остварил дополнителни 18,7 милиони долари нелегална добивка. Првично беше објавено дека се уапсени шест лица, вклучувајќи го и Момировиќ, но во текот на денот бројот на апсења како дел од истрагата за корупција по уривањето на настрешница на железничката станица во Нови Сад во ноември се искачи на вкупно единаесет.

Поранешниот министер Момировиќ беше уапсен заедно со поранешната заменик-министерка Анита Димоски, како и Небојша Шурлан, поранешен вршител на должноста директор на Српската железничка инфраструктура (IZS), и Синиша Јокиќ, поранешен директор на Заводот за заштита на спомениците во Нови Сад, како и неколку други менаџери на приватни компании.

Меѓу осомничените е и Горан Весиќ, долгогодишен соработник на Вучиќ и министер за транспорт од 2022 до 2024 година, кој моментално е на болничко лекување. Акцијата за апсење ја спроведе специјална полициско-обвинителска група за истрага на финансиски текови и организиран криминал.

Истрагата се проширува и на други сегменти од железничкиот проект кон унгарската граница.