Вучиќ прогласи победа над студентите откако полицијата ги растера со солзавец,
Претседателот на Србија, Александар Вучиќ, во објава на Инстаграм од шаторот во Пионирски парк каде што седеше со „студенти кои сакаат да учат“ ја објави нивната победа.
„Еве ме тука во Пионирски парк, или како што сакаме да го наречеме, Ќациленд, со гордост, со овие прекрасни млади луѓе кои само сакаат да учат и кои сега сфаќаат дека конечно победиле“, рече Вучиќ.
Претседателката на Собранието на Србија, Ана Брнабиќ, објави дека студентите на вчерашниот протест во Белград на плоштадот Славија повикале на граѓанска војна.
„Блокаторите не го завршија својот митинг на Видовден со зборовите – Да живее Србија. Завршија со морничав повик за убивање на Србија, монструозен и отворен повик за граѓанска војна. Памти Србијо“, напиша Брнабиќ на социјалната мрежа X.
Оретходно српската полиција употреби солзавец вечерва во обид да растера демонстранти во центарот на Белград кои фрлаа кон нив со шишиња и петарди. Министерот за внатрешни работи Ивица Дачиќ ги осуди нападите врз припадниците на полицијата од страна на учесниците на протестот на плоштадот Славија.
„Остро ги осудувам бруталните напади од страна на учесниците на непријавениот митинг во Славија врз припадниците на полицијата. Полицијата ќе преземе сите мерки за воспоставување на јавниот ред и мир, ќе ги одбие сите напади и ќе ги примени сите овластувања за одбивање на нападите, како и ќе ги уапси сите оние кои ја нападнаа полицијата“, рече министерот Дачиќ.
Припадници на жандармеријата почнаа со интервенции за растерување непосредно пред 22 часот во центарот на Белград против група млади лица кои, по завршувањето на студентскиот протест, фрлаа факели и петарди кон нив.
Немирите почнаа неколку минути по завршувањето на собирот, а откако студентското обезбедување го напушти просторот што ги одвојуваше демонстрантите и приврзаниците на власта кои се пред српското Собрание.
Неколку учесници во повеќе инциденти се уапсени, а полицијата не им дозволи на новинарите да го снимаат апсењето.За време на полициска интервенција, повреден е и асистентот на телевизијата Н1, Јован Павловиќ, јавува телевизијата.
Претходно, групи на маскирани мажи се судриле со полицијата во близина на црквата „Свети Марко“. Тие фрлаа шишиња и ракетни факели кон полицијата, а беа испукани и неколку топовски истрели.
Полицијата се судри со демонстрантите и на булеварот Крал Александар, а интервенираше и на улицата Кнез Милош, во близина на турската амбасада во Белград. Како што јавува Н1, во еден момент биле испукани неколку топовски истрели и петарди.
Официјалниот крај на студентскиот протест беше прогласен преку звучниците на плоштадот Славија околу 21:45 часот.
„Од овој момент, ова повеќе не е студентски протест. Ние остануваме тука како граѓани. Оваа борба не е само студентска. Денес, сите бараме избори. Сите ќе се кренеме и сите ќе победиме“, се вели во снимена порака емитувана на звучниците.
Десетици хулигани се приведени доцна синоќа во инцидентите што се случија во центарот на Белград, додека шест полицајци и двајца граѓани се повредени, соопшти по полноќ директорот на српската полиција Драган Васиљевиќ откако беше нападната полицијата по завршување на протестот „Се гледаме на Видовден“ организиран од Студентите во блокада.
На прес-конференција, Васиљевиќ рече дека повредените се уште се во Ургентниот центар и дека полицијата реагирала откако учесниците на митингот го нападнале полицискиот кордон што ги штител луѓето во и во близина на Пионирски парк каде се поддржувачи на властите во Србија.
Студентите во блокадата објавија дека властите се одговорни за радикализацијата по протестот во Белград.
„Властите ги имаа сите механизми и целото време да ги исполнат барањата и да спречат ескалација. Наместо тоа, тие се одлучија за насилство и репресија врз граѓаните. Секоја радикализација на ситуацијата е нивна одговорност“, објавија на Х, студентите во блокада.
Околу 140.000 демонстранти се собраа во Белград со барања за распишување парламентарни избори и да го прекине собирот што се одржува неколку месеци во Пионирски парк во центарот на Белград и пред Парламентот.
Протестот беше една од најголемите акции предводени од студентите во блокада во изминатите повеќе од половина година, што почна во ноември откако во почетокот на тој месец се урна бетонска настрешница железничката станица во Нови Сад, при што загинаа 16 лица, трагедија за која ја обвинуваат обвинува вкоренетата корупција.
Независниот монитор на протести, Архива на јавни собири, ја процени бројноста на толпата на околу 140.000, значително поголема од полициската проценка од 36.000 демонстранти.
„Сакаме избори!“ скандираше толпата, носејќи српски знамиња и држејќи транспаренти со имиња на градови и места од целата држава.
Српскиот претседател Александар Вучиќ завчера изјави дека очекува инциденти на протестот „Се гледаме на Видовден“ во Белград и дека „насилството ќе започне помеѓу 20:45 и 21:45 часот“.
Полициската интервенција против демонстрантите почна веднаш откако беше прогласен крај на протестот (околу 21.40 часот). Заврши околу половина час по полноќ, а во Пионирски парк каде се студентите кои се спротивставуваат на блокадите од 6 март, музиката престана околу еден час по полноќ. Таму се одржа „литературна вечер“ каде беа присутни и претставници од Владата и политички партии од владејачкото мнозинство.
На крајот од протестот на плоштадот Славија, студентите во блокада ја прогласија владата во Србија за нелегитимна и објавија дека во 21 часот истекол ултиматумот што го поставија до Владата на Србија – распишување вонредни парламентарни избори и прекин на собирот на поддржувачите на владата во Пионирски парк и пред Народното собрание.
Повеќе од половина година, студентите блокираат универзитети и организираа големи демонстрации низ целата земја, барајќи транспарентна истрага за смртните случаи. Досега има само приведени кои потоа беа пуштени да се бранат од слобода, но нема судска разврска за трагедијата.
Од протестот на студентите во блокада што се одржа на плоштадот Славија беше порачано – „Земете ја слободата во свои раце, ние веруваме во вас, имате зелено светло“.
„Нема да ви кажеме што да правите, не затоа што не знаеме, туку затоа што вие знаете. Народот треба да се води според својата совест. Времето е ограничено, но не и ние. Ова е граѓански, а не повеќе студентски протест, беше кажано на официјалниот крај од протестот.
„Денеска, 28 јуни 2025 година, ја прогласуваме сегашната влада за нелегитимна“, рече студент во блокада и еден од говорниците на протестот.
Владан Ѓокиќ, ректор на Универзитетот во Белград, се обрати пред присутните, и рече дека „вечерва се собравме тука за да го потврдиме единството во одбраната на основните демократски и универзитетски вредности“.
Ѓокиќ, во говорот на граѓанскиот протест нагласи дека „студентите, со својот храбар и мирен бунт, го обединија целото општество во заедничка мисија – да ги зачуваат институциите, правдата и правото на различност“.
„Затоа чувствуваме гордост, припадност и одговорност да истраеме. Промената ја иницираа студентите, храбро, непоколебливо, а универзитетот застана покрај нив, како и покрај бунтовните граѓани“
Според белградски медиуми, претпладнево (11 часот) се очекува обраќање на српскиот претседател Александар Вучиќ.