Вучиќ ќе патува за Москва и покрај заканите од Брисел

Српскиот претседател Александар Вучиќ потврди дека ќе отпатува во Москва за да присуствува на парадата на Денот на победата на 9 мај, пркосејќи на повиците на Европската унија да се држи настрана.Ова го објави Асошиетед прес.

„Во наредниот период ќе бидеме под притисок во врска со настанот во Москва на кој најавивме учество“, рече Вучиќ.

Официјални претставници на ЕУ претходно го предупредија српскиот претседател дека присуството на прославата може да ги прекрши критериумите на блокот за земјите кандидати и да им наштети на изгледите за пристап на Србија во ЕУ. Тие нагласија дека посетата ќе се смета како знак на поддршка за рускиот лидер Владимир Путин и руската војна против Украина.

Сепак, Вучиќ потврди дека српската воена единица ќе учествува на парадата на 9 мај на Црвениот плоштад во Москва. Тој додаде дека ова ќе биде првпат Србија да учествува на, како што рече, „заеднички организирана“ парада.

На парадата на 9 мај во Москва, покрај српскиот претседател Александар Вучиќ, се очекува да присуствуваат и словачкиот премиер Роберт Фицо и Милорад Додик, претседателот на Република Српска. Според RTVI, лидерите од Кина, Бразил, Индија и други земји слично се очекува да бидат присутни на настанот.

Претходно оваа недела, шефицата за надворешна политика на ЕУ, Каја Калас, истакна дека блокот „многу јасно стави до знаење дека не сакаме ниту една земја кандидат да учествува во овие настани на 9-ти мај во Москва“.

Додека повеќето западни земји го одбележуваат крајот на Втората светска војна на 8 мај, Советскиот Сојуз избра да ја одбележи на 9 мај, а Русија продолжува да го прави тоа и денес. Разликата се сведува на временските зони: предавањето на Германија беше потпишано доцна вечерта на 8 мај во Централна Европа, но веќе беше по полноќ на 9 мај во Москва.

Претходно, портпаролот на Кремљ, Дмитриј Песков, најави дека повеќе од 20 шефови на држави и влади се очекува да присуствуваат на Парадата за Денот на победата во Москва на 9 мај.