Во Косово седуммина починати и 337 заразени од Ковид-19, од утре нови мерки

Косово – Бројот на жртви на епидемијата на Ковид-19 во Косово се искачи на 688, откако минатото деноноќие починаа седуммина заразени од коронавирусот, јави дописникот на МИА од Приштина.

Во денешното соопштение на Националниот институт за јавно здравство на Косово (ИКШПК) се наведува дека, по рекордните 514 заболени во петокот, во саботата се регистрирани нови 337 случаи, со што бројот на лица кај кои е откриен вирусот од почетокот на пандемијата надмина 20 илјади и сега изнесува 20.179.

Вклучително вчерашните 91, вкупно досега болеста ја совладале 15.611 лица, така што активни случаи моментно во земјата се 3.880.

Вчера се извршени 1.318, а од почетокот на заразата вкупно 95.774 тестирања со методот РТ-ПЦР.

Откако минатите денови беа забележани рекордни бројки на новозаразни од коронавирусот, од утре во Косово стапуваат во сила нови заострени мерки за заштите од ширењето на епидемијата.

Меѓу другото, се забранува работата на трговските центри и на угостителските објекти од 21 до 5 часот, се редуцира персоналот во јавните и приватните претпријатија, освен во безбедносните и здравствените институции, додека наставата на државните и приватните универзитети ќе се изведува исклучиво онлајн.

И покрај тоа, косовскиот премиер Авдулах Хоти вели дека состојбата со пандемијата на Ковид-19 во земјата и натаму е под контрола и дека во Косово има многу помалку заразени од коронавирусот во споредба со земјите од регионот и Европа.

Хоти преку неговата страница на Фејсбук порача дека Владата успева да се справи со заразата, но побара од граѓаните да продолжат да ги почитуваат мерките кои ги препорачуваат здравствените власти, со цел што полесно да се преброди новиот бран на пандемијата.