Во Калифорнија е прогласена вонредна состојба поради бури и поплави. Стотици евакуирани

Силна бура ја погоди Калифорнија, предизвикувајќи поплави опасни по живот и принудувајќи стотици луѓе да се евакуираат во средината на божиќните празници. Гувернерот прогласи вонредна состојба во шест окрузи поради вонредните услови, а се очекува бурата да продолжи и во текот на Божиќ, објави Скај њуз.

Силните дождови го погодија јужниот дел од американската држава на Божик предизвикувајќи широко распространети поплави. Снимките од планинско одморалиште покажаа порои од кал и отпад како течат по патиштата, додека надојдената вода се пробиваше низ тремовите на домовите.

Националната метеоролошка служба на САД предупреди дека бурата ќе продолжи во текот на Божиќ и издаде ретко предупредување за „висок ризик од прекумерни врнежи од дожд“.

Гувернерот на Калифорнија, Гавин Њусом, прогласи вонредна состојба во шест окрузи за да им овозможи на, како што рече, „службите за итни случаи и однапред поставените ресурси да ги одржат нашите заедници безбедни“.

Властите на округот Лос Анџелес издадоа околу 130 наредби за евакуација на домовите што се изложени на ризик. Многу од тие домови се во области што беа уништени од големи пожари претходно оваа година.

Метеорологот од Националната метеоролошка служба, Мајк Вофорд, изјави дека Јужна Калифорнија обично добива до еден инч дожд во ова време од годината. Но, оваа недела, во многу области може да има помеѓу 4 и 8 инчи дожд, а уште повеќе во планините.

Опасност од снег и лавини во планините
Обилните снежни врнежи и силните ветрови во планинскиот венец Сиера Невада создаваат „скоро невозможни услови“, што го прави патувањето низ планинските превои „скоро невозможно“. Центарот за лавини во Сиера, исто така, издаде „значајно“ предупредување за лавини за областа на езерото Тахо.

Според „Пацифик гас енд електрик“, повеќе од 165.000 домови добија обновена електрична енергија по прекините предизвикани од бурата.

Калифорнија е склона кон екстремни временски услови, а ситуацијата е дополнително комплицирана од циклус на екстремно влажни периоди што се менуваат со ненадејни и продолжени суши. Златната држава се соочила со бројни природни катастрофи во минатото, од суши и пожари до земјотреси и поплави.