ВМРО-ДПМНЕ: Зградата на СДСМ е поранешен МОН, и таа да стане студентски дом
Унијата на младите сили на ВМРО-ДПМНЕ реагира на барањата Берлата палата да се претвори во студентски дом порачувајќи дека зградата на СДСМ е поранешно Министерство за образование и наука – па тие што ја бараат нивната зграда да почнат иницијатива и за таа на владеечката партија.
„Пред малку, УСС УКИМ објави соопштение кое искрено се надеваме дека не е пишувано од центарот за комуникации на СДСМ. Во Македонија образованието е урнисано, студентските домови се руинирани, нови не се градат. Да потсетиме што беше ветувано:
1. Нови четири студентски града ( Битола, Штип, Тетово и Скопје)
2. Младинска гаранција
3. Враќање на младите назад во Македонија
4. Студентска платежна картичка за попусти
На ова немаше вака жолчна реакција , а немаше реакција ни за:
1. За неизградената зграда на ФИНКИ и ФФК
2. За условите во студентските домови
3.За храната во студентските домови
4. За стипендиите кои беа доделени на децата на функционери на СДСМ
За овие состојби и квалитетот на живот на студентите континуирано алармираме и апелираме до надлежните во последните 5 години. За подобрување на оваа ситуација потребна е стратегија, а не популистички мерки и предизборно манипулирање кое е пракса во последните 5 години. Студентите се иднината на нашата држава и нивниот капацитет и потенцијал државата мора да го препознае.ВМРО ДПМНЕ по следните предвремени парламентарни избори се обврзува дека ќе ги подобри условите во студентските домови, мензите и храната во нив, квалитетот на образованието кое ќе го добиваат студентите и можностите по завршувањето на образованието, ќе се зголемат стипендиите, ќе се стимулираат студентите преку повеќе мерки.
Интересен е фактот дека штабот на СДСМ, познатата Бихачка е поранешна зграда на МОН, па ве повикуваме да почнеме иницијатива за трансформација на овој „простор“ во студентски дом.И за крај ВМРО ДПМНЕ не е штабот, ние сме постојано во комуникација со студентите по улиците, по дискотеките, кафулињата, парковите, читалните, стои во реакцијата.