(Видео)Абазовиќ не наздрави за победата на Милатовиќ

Црногорскиот премиер Дритан Абазовиќ со својот потег ја насмеа јавноста во регионот.

Имено, на социјалните мрежи се појави видео од несмасната реакција на Абазовиќ за време на синоќешната прослава на победата на Јаков Милатовиќ како претседател на Црна Гора.

Во тој момент во штабот на Милатовиќ се славеше по објавувањето на резултатите, а се пиеше и шампањско.

И Абазовиќ тргна да земе чаша вино, но изгледа во тој момент се предомисли и се откажа од намерата. Како што можете да видите, накратко размислува што да прави.

Sjetio se da je Ramazan 😆 #izbori2023 pic.twitter.com/TtdSwnZaVo

— 1️⃣od💯za1️⃣ (@Nermin007) April 2, 2023

Неговата реакција насмеа многумина, а причините поради кои се откажа од здравицата се само шпекулации.

Инаку, денека Абазовиќ изјави: „Црна Гора во изминатите неколку дена положи голем демократски испит“, по средбата на министрите за надворешни работи на земјите од Западен Балкан што се одржа во Рим.

– Ние претходните денови положивме голем демократски испит, покажавме дека можеме целосно слободно да организираме избори, во опуштена атмосфера, и да им овозможиме на граѓаните да избираат онака како што мислат дека треба, рече Абазовиќ.

Тој додаде дека верува оти со тоа се отвора нова перспектива кога станува збор за владеењето на правото во Црна Гора.

– Ова е дел од нашата европска агенда и сигурен сум дека целиот политички спектар треба да се собере околу нашата европска иднина, рече Абазовиќ.

Тој наведе дека на средбата на министрите за надворешни работи на земјите од Западен Балкан разговарале за многу теми. Додаде дека средбата поминала во многу добра и позитивна атмосфера.

Абазовиќ му се заблагодари на европскиот комесар за проширување Оливер Вархеји кој го отвори прашањето за идејата за изградба на регионален енергетски терминал, кој би го финансирала Европската унија.

Тој рече дека Црна Гора е подготвена да аплицира, да ги понуди своите капацитети и додаде дека енергетиката е во нивниот фокус подолго време.

– Она што не интересира е конечно да добиеме поморска врска со Италија, да го вратиме траектот Бар-Бари, Бар-Анкона, да го вратиме нашиот Свети Стефан. Тоа е амбиција на Владата, рече Абазовиќ.

Според него, Црна Гора е место на спојување.

– Верувам дека можеме да придонесеме за некои регионални процеси што се случуваат и дека конечно треба да се стави фокус на она што е заедничка иднина, економија и животниот стандард, рече Абазовиќ.

Зборувајќи за претстојната туристичка сезона, тој рече дека очекува голем број туристи од ЕУ и од регионот.

– Мислам дека во секој случај, на секое место во Европа и светот, Црна Гора демонстрира дека е земја достојна за почит, рече Абазовиќ.