(ВИДЕО) Филипче и Мицкоски договориле работни тела за спроведување на реформската агенда

Состанокот беше добар и конструктивен, оцени претседателот и пратеник од СДСМ, Венко Филипче по средбата со премиерот и лидер на ВМРО-ДПМНЕ, Христијан Мицкоски. Тој соопшти дека се договориле со Мицкоски да формираат работни групи.

„Имавме навистина конструктивен состанок со премиерот, сметам дека и до него е стигнато барањето од граѓаните за заедничка работа во некои сфери за подобрување на квалитетот на живот. Договоривме да работиме на начинот, да формираме тела и работни групи за спроведување на реформската агенда. Значи првичните закони во делот на правосудството,  енергетиката и некои работи околу стратешките движења во здравството. Ова е првичен состанок, да видиме каква ќе биде методологијата“, рече Филипче.

Тој  дополни  дека не договориле следна средба, но дека ќе делегира стручни лица од енергетиката и правосудството за да се  вклучат во изработката на законите кои се дел од реформската агенда. Посочи дека очекува сите политички партии да седнат на маса за овие теми.„Ова е за доброто на државата“, вели Филипче, додавајќи дека немаме доволно човечки капацитет, а младите се повеќе заминуваат од земјата поради што мора да се пушти порака за обединување за доброто на државата.

„Разговаравме и за евроинтеграциите, за што за жал имаме различни позиции. Го разбирам премиерот и за ова дополнително ќе разговараме“, посочи Филипче.

Според него, следен логичен чекор е лидерска средба.

„Мислам дека со тоа што покажуваме свест, разум и слух за барањата на граѓаните и се обидуваме да воспоставиме нов модел на соработка во интерес на барањата на граѓаните, прво преку рефромската агенда, сметам дека е добар позитивен сигнал. Со ова сметам дека граѓаните треба да бидат свесни дека некој ги слуша нивните барања“, додаде Филипче одговарајќи на прашањето дали тој и Мицкоски имаат политички легитимитет да решаваат натаму проблеми во Македонија. 

Околу дилемата дали стравува од одговорност ако се реотвори случајот за модуларната болница во Тетово, но и случајот за нивната изградба Филипче рече дека напротив, ќе го поддржи тој што ќе го побара тоа.

„По тој случај јас поднесов оставка од морални причини. Ако ме прашувате лично, не стравувам од ништо. Ако било кој смета дека треба да се отвори било кој случај, јас тоа го поддржувам“, одговори кратко Филипче.

Беше прашан исто така дали Зоран Заев направил добри работи додека бил чело на партијата и Владата.

„Од една партија која губеше многу избори Заев ја донесе партијата до владеење. Реши повеќедецениски проблеми на државата кои нас нѐ донесоа на меѓународната сцена, да бидеме во НАТО. Дали беше лесно? Не. Не беше ни мала жртвата. некој требаше да го направи тоа. Гледајќи и низ оваа призма кога треба да решаваме напластени проблеми од минатото, да се запрашаме каде ќе беше Македонија ако во 90′ го решеше проблемот со Грција? Апсолутно мислам дека со сите други полтиики, од социјалата и други сегменети на живеење, да“, одговори Филипче.

На крајот тој уште еднаш нагласи дека не станува збор за етнички состанок, како што тврдеа од ДУИ и од Алијансата за Албанците и наедно негираше дека станало збор и за наредните избори. 

По средбата со соопштение се огласија и од кабинетот на Мицкоски. Во него стои дека била истакната потребата да се работи на заедничката иднина за граѓаните, како и да се работи на консензус меѓу различните страни за клучните прашања за државата и добробит на сите граѓани.

Во тој контекст, стои во соопштението, неопходно е да се мобилизираат сите напредни поединци и структури кој можат да дадат придонес на патот за развој на земјата. Македонските државни интереси треба да бидат појдовната точка во разговорите за секое прашање, при што Мицкоски побара од Филипче да се потруди да биде конструктивен фактор во определбата за промени, реформи и напредок.

„Државата мора да биде во служба на граѓаните и да се случат коренити реформи на системот од кој граѓаните се незадоволни“, истакнал Мицкоски на средбата.

И од кабинетот потврдуваат дека двајцата лидери се договориле да се формираат работни групи кои ќе разговараат за реформските законски решенија кои треба да ги гарантираат заложбите за напредок.

Колку биле искрени разговорите сепак е тема под прашалник бидејќи веднаш по соопштението од Владата дојде соопштение од ВМРО-ДПМНЕ во кое се омаловажуваше Филипче како лидер на СДСМ во контекст на веројатно нарачаното новинарско прашање – дали гледа нешто добро во владеењето на Зоран Заев претходно?

„Венко Филипче на отворена сцена денес го фалеше Зоран Заев.Со други зборови тој кажа дека народот треба да му биде благодарен што Заев ја водеше држава, што го смени името, ја упропасти економијата, што СДС стана безгласна буква преку ДУИ, Артан и Ахмети.

Венко Филипче не чувствувал одговорност за модуларната болница и кажа дека понудил оставка, а не кажа дека заеднички со Заев одлучија да продолжи да биде министер за здравство и оставката беше само блеф кој народот не ја проголта. Венко Филипче е продолжение на црнилата, криминалот, предавствата и поразите на Зоран Заев. Тој нема никаков кредибилитет. Тој е само чувар на фотелјата и продолжена рака на Зоран Заев“, стои во соопштението без да се каже – зошто тогаш Мицкоски воопшто прифати средба и договара заеднички работни тела и како зборува за искреност и чесност а во исто време продолжува со плукачката политика кон опозицијата?  Поточно на кое соопштение треба да му се верува – на тоа од Владата или на тоа од партијата?