Весиќ: ЕУ го форсираше Коридорот 8, ние се изборивме за Коридорот 10

Железниците се геополитика и за нас е важно што сите излези од Запеден Балкан водат преку Србија. Ние успеавме да се избориме да се обнови Коридорот 10. ЕУ почна да го форсира коридорот преку Романија (за поврзување со Бугарија, Грција и Турција, н.з.), како и коридорот 8 од Албанија до Бугарија, оној кој поминува низ Северна Македонија. Но, за нас е многу важно што успеавме да се избориме да бидеме централна земја низ која поминуваат брзи пруги и целиот Западен Балкан поинаку не може да излезе кон Европа и кон исток“, рече министерот за градежништво, сообраќај и инфраструктура на Србија Горан Весиќ во емисија за Курир ТВ.

Во емисијата која беше посветена на патните и железничките коридори во Србија и на Западен Балкан и поттикната од неговата средба со неговиот турски колега Абдулкадир Уралоглу, за време на посетата на Ердоган на Белград, тој посочува дека железницата се всушност геополитичко прашање и дека Србија се бори да биде централна земја низ која ќе минуваат брзи железници од Европа во Азија.

„Ова беше нашиот прв разговор и ќе ги продолжиме преговорите. Го поканив мојот турски колега на отворањето на брзата пруга од Нови Сад до Суботица на 24 ноември, кога ќе разговара со мене и со унгарскиот министер Лазар Јанош за крак од брзата пруга што ја градиме кон Турција“, изјави Весиќ за ТВ Курир.

Кога станува збор за Бугарија, тој потсети дека во октомври ќе има избори во таа земја, па очекува и оваа земја да се приклучи на овој проект по формирањето на владата.

„Нашата пруга е завршена и ќе продолжи до Будимпешта. Унгарија гради брза пруга долга 164 километри, која ќе биде завршена до крајот на 2026 година. Продолжуваме со изградба на брза пруга од Белград до 230 километри, до Ниш за брзина од 200 километри на час, а до февруари ја завршуваме пругата Ниш – Брестовац, долга 23 километри“, изјави министерот Весиќ.

Тој потсети дека со Владата на Северна Македонија е договорен заеднички проект за изградба на брза пруга од Брестовац до Скопје – 135 километри во Србија и уште 50 од границата до Скопје, за што двете земји заеднички ќе бараат пари од ЕУ, но и од други финансиери ако не излезат во пресрет од Брисел. Во Грција, додаде тој, веќе се планира изградба на брза пруга, со договор на претседателот Александар Вучиќ и премиерот Киријакос Мицотакис, од Солун до Идомени, на грчко-македонската граница, по што останува делот од Скопје до Грција да се изгради, бидејќи веќе има пруга од Солун до Атина, која се реконструира.

„Ќе имаме брза пруга од Будимпешта до Атина долга 1.521 километар, која ќе биде столбот на железничкиот сообраќај во овој дел на Европа, а ќе оди преку Србија. Ни треба крак од оваа пруга од Ниш до Истанбул “, рече Весиќ.

Во оваа смисла, со информацијата дека Турција има 2.500 километри брзи пруги, за брзини од 200 до 250 километри на час, Весиќ посочи дека Србија е заинтересирана да се поврзе со Турција и понатаму на исток преку Бугарија.

Тој посочи дека веќе се реализира проектот за обнова на пругата Ниш – Димитровград, но за брзини од 120 километри на час и оти студиите ќе покажат дали ќе се изгради нова траса за кракот од Ниш што треба да оди кон Бугарија.

„Како и да е, ќе имаме крак кон Бугарија до Турција, со железница која ќе продолжи преку Турција до Ирак и Кина и ќе обезбеди поврзување“, додаде Весиќ.

„Турците имаат пруга до Басра во Ирак. Градат пруга до Кина преку Азербејџан. Почнаа да градат брза железница во Истанбул – бугарско-турската граница. Во Бугарија веќе градат железница со брзина од 160 километри на час, од Софија до Драгоман, на границата со Србија Треба да го решиме прашањето за трасата на брзата пруга од Ниш“, објасни Весиќ и додаде дека пред речиси една година наредил идеен проект на оваа железница.

Повтори дека железницата е геополитика, а Србија се бори сите железнички коридори да минуваат токму низ нејзината територија.Тој рече и дека турскиот министер е многу заинтересиран за железничкото поврзување со Србија.

„Секако дека е заинтересиран бидејќи што му вреди пругата кон Кина ако не се поврзе со Виена, Прага, а тоа може да се направи преку Србија. Затоа се важни односите меѓу претседателот Вучиќ и Ердоган бидејќи Турција не може да размислува од кој било друг коридор освен преку Србија. Тие се договорија со декларација на четири земји – Унгарија, Србија, Бугарија и Турција, заеднички да влезат во проектот за изградба на тој крак на брзата железница. Ќе излеземе до пристаништето Пиреја, со железница до Атина, но и до Босфор и ќе можеме да ја искористиме нашата позиција“, заклучи Весиќ.