Венс нема да се сретне со Шолц во Минхен зошто „нема долго да биде канцелар“

 МИНХЕН, Германија — Потпретседателот на Соединетите Американски Држави, Џеј-Ди Венс, нема да се сретне со германскиот канцелар Олаф Шолц на Минхенската безбедносна конференција, што претставува сериозен дипломатски прекор до лидерот на земјата домаќин во време на зголемени трансатлантски тензии поради потенцијалниот мировен договор со Украина. Германски функционер потврди за ПОЛИТИКО дека двајцата лидери нема да се сретнат на глобалниот собир, но нагласи дека Венс и Шолц веќе одржале состанок за време на самитот за вештачка интелигенција во Париз во понеделник. Меѓутоа, со оглед на тоа колку значајно геополитичките настани се променија оттогаш – особено со тоа што американскиот претседател Доналд Трамп целосно ја остави Европа надвор од разговорите за  мировниот план за Украина исо иглед на  неговите услови за  Владимир Путин, недостатокот на средба со Венс е впечатлив.

Тимот на Венс рече дека состанокот бил планиран, но не се случил поради конфликт со распоредот на германската страна.

„Двајцата лидери разговараа за закажување дополнителен состанок во Минхен, но таа средба за жал никогаш не беше потврдена поради конфликт со распоредот“  на Шолц, рече портпаролот Вилијам Мартин во изјавата. „Потпретседателот Венс е благодарен за гостопримството на нашите германски сојузници и со нетрпение очекува многу продуктивни разговори во Минхен овој викенд“.

Мартин, исто така, ја забележа претходната средба меѓу Шолц и Венс, велејќи дека потпретседателот бил „благодарен“ што се сретнал со германскиот лидер на самитот за вештачка интелигенција во Париз. Сепак, вестите ризикуваат да ги намалат шансите на Шолц на предвремените избори во Германија за 10 дена од сега, имајќи предвид дека неговиот противкандидат од десниот центар Фридрих Мерц, кој се очекува да стане следниот канцелар на земјата, ќе се сретне со Венс во Минхен на околу 20 минути.

Поранешен американски функционер рече дека Венс никогаш не планирал да се сретне со Шолц во Минхен бидејќи неговите планови се финализирале кон крајот на јануари и почетокот на февруари, дури и кога биле резервирани состаноци со помалку високи функционери како британскиот министер за надворешни работи Дејвид Лами и Мерц.

„Не треба да го гледаме, тој нема долго да биде канцелар“, така официјалниот претставник го опиша пристапот на тимот на Венс. 

„Тоа е непочитување кон Германија“, рече германски функционер кој не е од партијата на Шолц. „Не можам да го поднесам Шолц, но тој сепак е наш канцелар. Администрацијата на Трамп не се грижи за своите сојузници“.

Американскиот потпретседател сепак ќе се сретне со германскиот претседател Франк-Валтер Штајнмаер, кој има главно церемонијална улога и не е дел од владата. Германската министерка за надворешни работи Аналена Баербок и министерот за канцелар Волфганг Шмит ќе се приклучат на првиот дел од состанокот за да се осигураат дека владата има глас.

„Ова е срамно назадување кое само покажува како Германија не се сфаќа сериозно како главна сила во Европа од тимот на Трамп“, рече еден висок источноевропски дипломат, кому му беше дадена анонимност да зборува искрено за ова прашање.