„Ужасна порака“: бес во Австралија по дозволата Новак Ѓоковиќ да игра на грен-слемот во Мелбурн

Одлуката да му се одобри на Новак Ѓоковиќ изземање од барањата за вакцинација против Ковид-19 за да игра на Австралија опен во Мелбурн е означена како „ужасна“, при што некои играчи изразија изненадување од доцната одлука.

Во вторникот вечерта, бранителот на титулата на Австралија опен објави на Инстаграм дека доаѓа во Мелбурн да учествува на тенискиот турнир со „дозвола за изземање“.

Сите учесници на Австралија опен мора или да бидат целосно вакцинирани или да се пријават и да обезбедат медицинско ослободување за да влезат во државата Викторија без да го преземат задолжителниот 14-дневен карантин.

Тенис Австралија рече дека играчите кои барале изземање поминале низ процес во две фази, при што нивната апликација прво ја разгледувала комисија од експерти во Тенис Австралија, а потоа проценка од владата на Викторија.

Но, во средата попладне, министерката за внатрешни работи, Карен Ендрјус, посочи дека федералната влада, исто така, може да има збор за ова прашање. Ендрјус во изјавата рече дека Тенис Австралија и владата на Викторија треба да одлучат дали невакциниран играч може да учествува на Австралија опен, но „владата на Комонвелтот е таа што ќе ги спроведе нашите барања на австралиската граница“.

Премиерот Скот Морисон последователно рече кога Ѓоковиќ ќе пристигне „ако не е вакциниран, тој мора да обезбеди прифатлив доказ дека не може да се вакцинира од медицински причини“.

„Ако тие докази се недоволни, тогаш тој нема да биде третиран поинаку од кој било друг и ќе биде вратен во следниот авион дома – не треба да има посебни правила за Новак Ѓоковиќ“, рече Морисон во Канбера.

Главниот извршен директор на Тенис Австралија, Крег Тајли, рече дека ослободувањето дадено на Ѓоковиќ е истото медицинско ослободување што секој може да го добие според упатствата на Австралиската техничка советодавна група за имунизација (Атаги).

„Ако има неколку причини зошто тие не можат да се вакцинираат, Атаги постави многу јасни упатства што треба да се следат за да бидете додадени во австралискиот регистар за имунизација и ако сте додадени во тој регистар, тогаш сте ослободени од вакцинација и може да дојдете во Австралија“, изјави тој во средата.

„За тенисерите тоа беше процес кој беше над и подалеку од она што би го доживеал секој што доаѓа во Австралија. Едноставно затоа што имавме дополнителен панел… кој преку слепо прегледување ја проценуваше секоја апликација и потоа даваше исклучоци доколку тоа беше соодветно“.

Тајли рече дека останува на Ѓоковиќ да одлучи дали ќе ја открие причината за изземањето. Упатствата на Атаги наведуваат дека може да се дадат исклучоци за оние со акутни медицински состојби, вклучително и подложени на голема операција, оние кои имале Ковид-19 во изминатите шест месеци или имале сериозен несакан настан припишан на претходната доза на вакцина против Ковид.

Тајли на прес-конференција во средата рече дека може да разбере зошто луѓето би биле вознемирени поради одлуката.

„Некои од вас ќе бидат вознемирени поради фактот што Новак дојде поради неговите изјави од последните неколку години околу вакцинацијата“, рече тој. „Сепак, на крајот зависи од него да разговара со јавноста за неговата состојба ако одлучите да го сторите тоа, и причината зошто доби изземање. Ние ќе направиме се што можеме на сите да им дадеме еднаква можност да дојдат во земјата“.

Државната министерка за вработување, Џаала Пулфорд, призна дека за жителите на Викторија одлуката ќе биде фрустрирачка, но рече дека процесот на комисијата за одобрување на изземањето бил „неверојатно силен“ и дека Ѓоковиќ не добил посебен третман.

Реакцијата на јавноста на веста за изземањето на Ѓоковиќ беше огромно непријателска.

Стивен Парнис, поранешен потпретседател на Австралиското лекарско здружение, рече дека одлуката е ужасна.

„Не ми е гајле колку добар тенисер е. Ако тој одбива да се вакцинира, не треба да му се дозволи да влезе“, напиша Парнис на Твитер. „Ако ова изземање е точно, тоа испраќа ужасна порака до милиони луѓе кои сакаат да го намалат ризикот од #COVID19Aus за себе и за другите. #Вакцинирањето покажува почит, Новак“.

Многу Австралијци претходно ја обвинија владата дека им дозволува на богатите и славните да прават што сакаат, додека обичните луѓе остануваат одвоени од болните и блиските што умираат.

„Мислам дека тоа е срамота“, изјави жителката на Мелбурн Кристин Вартон за Еј-Би-Си. „Сите ја направивме вистинската работа, сите излеговме и ги добивме нашите вакцини и нашите трети дози и имаме некој што дојде од странство и одеднаш тој беше ослободен и може да игра“.

Британецот Џејми Мареј додаде: „Мислам дека ако јас не бев вакциниран, немаше да добијам ослободување. Знаете, но браво за него што успеа дојде во Австралија и да се натпреварува“.

Австралиските тенисери Џејмс Дакворт и Алекс де Минор изразија изненадување од одлуката.

„Видете, не ги знам критериумите за исклучоци. Да. Очигледно тоа е независен панел. Мора некако да има критериуми“, рече Дакворт.

„Тоа е многу политички коректно од тебе“, одговори Де Минор. „Сметам дека е многу интересно. Тоа е сè што ќе кажам“.

Тајли рече дека 26 луѓе поврзани со Австралија Опен поднеле барање за медицинско ослободување за да дојдат на турнирот, но само мал број биле одобрени.

Заменик-лидерот на викторијанските либерали, Дејвид Саутвик, рече дека тоа е „срамота“.

„Каква срамота! Имавме 6 карантини – затворени училишта и мали бизниси, кажамо ни беше да нема погреби и свадби, семејствата беа поделени со месеци и сега една тениска ѕвезда добива изземање“, напиша тој на Твитер.

„Удар во стомакот за секој Викторијанец“.

Одлуката, исто така, предизвика лути реакции на социјалните мрежи, при што многумина предвидуваа непријателско добредојде за деветкратниот шампион на Австралија опен кога ќе излезе на теренот.

Руската тениска ѕвезда Наталија Вихлјанцева во декември објави дека ќе го прескокне Австралија опен бидејќи вакцината „Спутник“ што ја примила не е призната во Австралија.

Минатиот месец, заменик-премиерот на Викторија, Џејмс Мерлино, рече дека исклучоците по медицински причини не треба да се гледаат како „дупка за привилегирани тенисери“ и дека се очекува сите на Австралија Опен да бидат вакцинирани.

Еден од оние што беше одбиен да добие медицинско изземање од организаторите е двократниот четвртфиналист на Австралија Опен, Тенис Сандгрен. Тој изјави дека не ги исполнил критериумите за медицинско ослободување за да се натпреварува на претстојниот Грен слем, и покрај тоа што невакцинираниот колега Новак Ѓоковиќ го добил. (Според агенциите)