Уште еден месец за исплата на К-15, казните за работодавците до 3.000 евра

Работодавачите од приватниот и јавниот сектор имаат обврска до крајот на месецот да го исплатат регресот за годишен одмор (К-15). Годинава, износот за вработените во приватниот сектор ќе биде околу 16.800 денари, што претставува 40% од просечната плата во последните три месеци. Во јавниот сектор, регресот изнесува 11.000 денари, со што ќе бидат опфатени над 84.000 вработени.

Сите вработени што работеле најмалку шест месеци кај ист работодавач во текот на годината имаат право на К-15. Работниците што ја смениле работата исто така го добиваат, ако претходно непрекинато работеле шест месеци во една компанија.

Сепак, работодавачите што се соочуваат со финансиски тешкотии може да исплатат помал износ, но тоа мора да биде договорено со Синдикатот. Минималниот износ е 40% од просечната плата, но некои компании исплаќаат значително понизок регрес, понекогаш само неколку илјади денари.

„Секој работник има право на регрес за годишен одмор, без разлика дали работи во приватниот или јавниот сектор. За жал, сè уште се соочуваме со случаи кога некои работодавачи го избегнуваат или го намалуваат законски утврдениот износ. Работниците треба да бидат охрабрени да пријавуваат вакви неправилности,“ изјави Љупчо Радовски од Сојузот на синдикатите на Македонија (ССМ).

За работодавачите што не го исплаќаат регресот, Законот предвидува парични казни:

-2.000 до 3.000 евра за компанијата.
-500 до 1.000 евра за одговорното лице.

Работодавачите што бараат вратени исплатени пари се соочуваат и со затворска казна од три месеци до една година.

Некои компании, во договор со Синдикатот, го исплаќаат К-15 на рати, со цел да избегнат финансиски притисок. Иако нема горен лимит, некои фирми исплаќаат и значително поголеми бонуси – до три просечни плати или новогодишни награди.

„Важно е да се запази минималниот износ утврден со законот и колективните договори. ССМ е секогаш подготвен да помогне во разрешување на ваквите проблеми и да ги заштити правата на работниците,“ додава Радовски.

Годинава, сите вработени во јавниот сектор, вклучувајќи ги здравството и образованието, ќе го добијат К-15. Оние компании со посебни колективни договори може да исплатат и поголеми износи.

Сите регреси треба да бидат исплатени до крајот на декември. Работниците се повикуваат да ја следат состојбата и да пријават неправилности кај ССМ или во Државниот инспекторат за труд за да го заштитат своето право.