Ураганот „Лидија“ го погоди Мексико, дуваше ветер со брзина и до 220 км/ч

Исклучително опасниот ураган „Лидија“ го погоди тихоокеанскиот брег на Мексико како бура од четврта категорија и донесе ветрови кои дуваа со брзина до 220 км/ч, а во меѓувреме ослабна на ниво од категорија втора, јавува Би-би-си.

Властите во државата Најарит соопштија дека маж загинал откако дрво паднало врз комбето што го возел. Ураганот „Лидија“ стигна на копното во малиот крајбрежен град Лас Пенитас непосредно пред 18 часот по локално време како бура од четврта категорија. Околу 21 часот дувале ветрови со брзина и до 165 км/ч, а ураганот се движел со брзина од 28 км/ч во правец исток-североисток.

Меѓутоа, како што се приближува до издигнат терен, треба брзо да ослабне.

Мексиканскиот претседател Андрес Мануел Лопез Обрадор објави дека повеќе од 6.000 припадници на вооружените сили излегле на терен за да му помогнат на населението.

Делови од брегот на Мексико во Пацификот веќе се значително поплавени од тропската бура Макс, во која загинаа две лица.

Урагани го погодуваат Мексико секоја година и на брегот на Пацификот и на Атлантикот.

Сезоната на урагани трае од мај до ноември, а повеќето бури се формираат помеѓу јули и октомври. Сè уште не е познато влијанието на климатските промени врз зачестеноста на бурите, но научниците велат дека зголемувањето на температурите на површината на морето го загрева воздухот над и ги „храни“ ураганите, циклоните и тајфуните со енергија.

Планетата веќе се загреа за 1,1 степен од почетокот на индустриската ера, а температурите ќе се зголемат доколку владите ширум светот не ги намалат емисиите.