Управата за матични книги најавува блокада на Министерството за финансии
Поради штрајкот на Управата за водење матични книги, граѓаните не можат да вадат изводи од книгата на родени, венчани и умрени.
Дел од вработените во Управата за водење матични книги, кои штрајкуваат речиси еден месец, денеска се пожалија дека наишле на арогантен однос од институциите.
„Во ваква ситуација досега не сме се нашле, ваков однос арогантен од страна на владата и од институциите не очекувавме“, се пожали Марјан Ристески од Независниот синдикат на Управата за водење матични книги.
Вели дека подолг период бараат средба, но таа никако да се случи и најави дека в среда ќе го блокираат Министерството за финансии, од кое бараат повисоки плати.
„Доколку и таму во среда немаме средба, ќе ја радикализираме состојбата“, вел Ристески.
Во Управата за водење матични книги се околу 500 вработени, а според Независниот синдикат штрајкуваат 70 отсто од нив.
Од почетокот на штрајкот, синдикатот се договори со Министерството за правда за колективниот договор, а од Министерство за финансии бараат 30 отсто покачување на платата.