Украина го забрани рускиот цртан филм „Маша и мечката“

На Украинците повеќе не им е дозволено да ја гледаат меѓународно познатата руска анимирана серија „Маша и мечката“ во нивната земја. Владата во Киев денеска воведе санкции за  продуцентите на серијата и ги опиша руските цртани филмови како закана за националната безбедност.

– Само во 2025 година, YouTube каналот на украински јазик за „Маша и мечката“ имаше над 800 милиони прегледи, објави министерката за култура Татјана Бережна на Фејсбук.

Таа додаде дека сега постои законска основа за блокирање на програмите во Украина.

– Нема место за руска пропаганда на детските екрани, напиша Бережна.

Забраната следува по новинарска истрага од минатата година која откри дека YouTube каналот на украински јазик за руската анимирана серија бил убедливо најпопуларен во Украина.

Според авторите на извештајот, креаторите генерираат приходи од рекламирање преку каналот, што е од корист за руската армија во нејзината борба против Украина.

Главните ликови во цртаните филмови се мало девојче по име Маша, облечено во традиционална руска облека, и поранешна циркуска мечка која комуницира исклучиво преку гестови и звуци.

Серијата се прикажува од 2009 година и се емитува во десетици земји. Критики за содржината имаше и во Велика Британија и Естонија, бидејќи Маша се појавува во неколку епизоди облечена во воена облека и со советски симболи.

Москва го осуди потегот на Украина да ја забрани „Маша и мечката“.

– Фактот дека Украина започна војна против цртаните филмови, уште еднаш ја покажува омразата на режимот во Киев, рече портпаролот на Кремљ, Дмитриј Песков.

Забраната за прикажување на цртаната серија е воведена за почетен период од 10 години. Киев ги повика и своите сојузници да преземат мерки против дистрибуцијата на руските анимирани филмови.

Украина во јуни годинава протестираше поради одлуката на Netflix да ги купи правата за емитување на новите сезони на „Маша и мечката“.

Според весникот „Украинска правда“, во август 2025 година, украинскиот YouTube канал „Маша и мечката“ бил рангиран на првото место на најпопуларни канали за деца во Украина. Моментално има повеќе од 18 милиони претплатници.