Уапсени околу 100 лица за грабежи и измами во разурнатите подрачја во Турција

Турските безбедносни сили уапсија најмалку 98 лица во саботата за наводно ограбување оштетени згради и грабеж или измама на жртвите од разорниот земјотрес минатата недела, објави турската државна новинска агенција Анадолу. Најмалку 42 осомничени се под истрага во јужната турска провинција Хатај за наводно ограбување оштетени згради.

Уапсени се најмалку 40 осомничени, а безбедносните сили заплениле шест пиштоли, три пушки, накит, банкарски картички, околу 11.000 долари и 70.000 турски лири (околу 3.700 евра) во готовини.

Уапсени се уште две лица откако се претставиле како хуманитарни работници и наводно се обиделе да ограбат шест камиони со храна за жртвите од земјотресот во провинцијата Хатај, соопшти агенцијата.

На друго место во земјата, десетици други осомничени беа уапсени за наводен грабеж во областите погодени од земјотресот, јавува Анадолија.

Осомничените се уапсени во најмалку осум провинции, вклучувајќи ги Кахраманмарас, Хатај, Адијаман, Малатија, Османије, Адана, Газиантеп и Шанлиурфа.

Инаку, споресд последните податоци, повеќе од 28.170 луѓе загинаа во земјотресот во Турција и Сирија, додека десетици илјади луѓе беа повредени. Помош за Турција пристигнува од целиот свет, додека сириската влада ја доби првата помош од ЕУ по земјотресот. Во Турција, според последните податоци, загинале најмалку 24.617 луѓе, а повеќе од 80.000 се повредени, а најмалку 3.553 луѓе загинаа во Сирија.