Уапсени двајца бомбаши во Риека, Хрват и Германец

Двајца од уапсените бомбаши во Риека, Хрват и Германец, кои полицијата ги поврзува со низа поставени експлозивни направи, утрово треба да бидат одведени на распит во Жупаниското државно обвинителство. После тоа судијата на истрагата треба да одлучи дали одат во едномесечен истражен притвор.

Засега има малку официјални информации, но тоа би требало да се смени денеска во 13 часот кога полицијата во Риека најави вонредна прес-конференција. Се очекува на дуото да му биде одреден притвор поради ризик од влијание врз сведоци и повторување на делото или поради ризик од бегство, пишува ХРТ.

Можно е и овие случаи во кои беа поставени експлозивни направи во близина на трговски центри да се поврзани со случајот од април кога беше пронајдена експлозивна направа во хотел во Опатија. Но, засега сето тоа се шпекулации и нема официјална потврда од полицијата.

Божиновиќ: Ова очигледно на некој начин е поврзано
Министерот за внатрешни работи Давор Божиновиќ изјави дека станува збор за полициска акција која започнала со откривање на направа во хотелот „Амбасадор“ во Опатија во април, по што на 21 мај била поставена експлозивна направа пред трговски центар во Риека.

„Овие дејствија очигледно се на некој начин поврзани. Полицијата уште од првиот ден започна многу сеопфатна и длабинска истрага“, рече министерот и додаде дека синоќешниот резултат е резултат на сериозна, квалитетна и професионална работа.

Тој им се заблагодари на сите кои учествуваа на ниво на Управата на полицијата, односно на Одделот за криминалистички работи и на вработените во полицијата на Приморје Горање.

„Практично, од април тие секојдневно работат на оваа тема, која има и меѓународна димензија“, изјави министерот за новинарите по церемонијата на Академијата по повод Денот на хрватската армија.