Уапсени 13 члена на француско-холандска банда, кои кревале во воздух банкомати низ Европа

Француската полиција во Стразбур уапси француско-холандска криминална банда која ограбувала низ Европа.

Според француските медиуми, станува збор за група од 13 мажи кои наводно украле стотици илјади евра. ТВ BFM објави дека бандата била уапсена во петокот наутро кога нејзините членови се вратиле од грабеж на банкомат во Германија.

Француската телевизија јавува дека осомничените се на возраст меѓу 25 и 30 години. Полицијата ја следела групата неколку месеци, објави NL Times.

Според францускиот весник Parisien, бандата оперирала околу 12 пати во Германија и најмалку пет пати во Швајцарија пред да ги префрли своите операции во Франција.

Во јули два банкомати биле кренати во воздух во Стразбур и околината.

Полицијата ги поврзала нападите на банкоматите со начинот на дејствување на бандата, при што сторителите секој пат по грабежите брзо се оддалечувале. Се наведува дека најголемиот дел од пленот дошол од Германија, каде што 13 осомничени кревале во воздух најмногу банкомати.

Тоа е затоа што банкоматите чуваат големи суми, бидејќи готовината сè уште е главниот начин на плаќање во Германија.

Благодарение на заедничката истрага на француската, германската и швајцарската полиција, уапсена е озлогласена меѓународна банда, пишува холандскиот портал.

Членовите на бандата најдоцна во вторник ќе бидат изведени пред судија во Нанси. Таму ќе се одлучува дали ќе им биде продолжен притворот.