Турција и Катар постигнаа прелиминарен договор со талибанската администрација за аеродромот во Кабул

 Турција и Катар постигнаа прелиминарен договор со талибанската администрација за аеродромот Хамид Карзаи во Кабул и уште четири аеродроми во Авганистан, јави Анадолија. Турско-катарската делегација, која вчера   пристигна во Кабул, постигнала начелен договор со авганистанската страна за управување со аеродромот Хамид Карзаи и четири други аеродроми во земјата, јави агенцијата повикувајќи се на извори.

„По разговорите за време на посетата на турскиот министер за надворешни работи, Мевлут Чавушоглу, на Катар на 7 декември, беше потпишан меморандум за разбирање помеѓу турски и катарски компании за урпавување со аеродромот преку рамноправно партнерство“, истакнаа изворите на агенцијата.

Постигнат е консензус за формирање меѓусебни технички тимови, со цел да се утврдат деталите и да продолжат преговорите преку техничките комитети во наредните денови.

„Во текот на следната недела ќе се одржат технички состаноци меѓу турско-катарската делегација од една страна и (привремената) авганистанска администрација од друга страна во врска со деталите на работа“, велат изворите.

Наведено е дека турско-катарската делегација, која ќе отпатува од Кабул за Доха, ќе продолжи да работи заедно.