Трендафилов: Мојата плата е 60.000, за толку ставам глава во торба

Платата моја е 60.000 денари, рече Слободан Трендафилов, претседател на Сојузот на синдикати на Македонија (ССМ) во „Топ тема“ на ТВ Телма.

„Поединци во ВМРО-ДПМНЕ кажуваат дека со 60.000 денари претседателот на ССМ се луксузира, не знам што прави. За 60.000 денари си ја ставам главата во торба, за борба за подобри плати на работниците. Кога видоа дека нема никаков контраефект, кон ССМ и кон мене како личност, излегоа на телевизија и кажаа дека платата ми била 75.000 денари и сум имал некакви приходи од неколку милиони денари, па ги собираат за 12, за 18 месеци и слично“, рече Трендафилов.

Тој рече дека ги напаѓаат со сите средства, со тешка артилерија, но се надеваат дека ќе се кријат и нема да се бранат. 

„За наша среќа, не сме почнале ниту да се браниме, а камоли да напаѓаме. Денот кога ќе одлучиме како ќе ги нападнеме, ќе биде денот кога истите овие 300 луѓе ќе одлучат да го повикаат народот на улица, доколку не нè почитуваат онака како што заслужуваме. Сметаме дека во една демократска држава , во едно демократско општество, една демократски избрана влада, треба да ги почитува претставниците на работниците, без оглед дали сме убави или не сме. Треба да ги почитуваат претставниците на работниците, и покрај тоа што не им се допаѓа тоа што го зборуваат, а тоа е потреба од зголемување на платите. Денеска политичари нè напаѓаат, затоа што бараме плата. Се надевам дека нема да биде обратно, ние да ги напаѓаме политичарите. Тоа што е опасно и што е преседан, е што владата се изема во комплетниот случај, од потребата за раст на платите и покрај тоа што таа е најголемиот работодавач во државатa“, истакна Трендафилов.