Трамп: Забрана за влез на бегалци без здравствено осигурување

Американскиот претседател Доналд Трамп потпиша регулатива со која им се забранува влез на мигрантите кои нема да бидат покриени со здравствено осигурување 30 дена од влезот во САД или немаат пари сами да ги платат своите здравствени трошоци.

Белата куќа наведува дека тоа нема да влијае врз можноста за добивање статус на азил или бегалец.

Мерката стапува во сила на 3 ноември.

Администрацијата на Трамп минатиот месец соопшти дека планира во фискалната 2020 година да дозволи во САД да влезат само 18.000 бегалци.

– Со оглед на тоа што нашиот здравствен систем се соочува со предизвици, американската Влада дополнително го отежнала проблемот со прифаќање на илјадници странци кои не биле во можност да платат за нивните здравствени трошоци, рече Трамп.

Тој додаде дека суспензијата се однесува само на лица што сакаат да влезат во САД со имигрантска виза.

Во документот се наведуваат видовите на осигурување што се сметаат за одобрени.