Трамп побара уште едно пребројување на гласовите во Џорџија

Кампањата на претседателот Доналд Трамп побара пребројување на гласовите во претседателската трка во Џорџија во саботата, еден ден откако државните службеници ги потврдија резултатите кои покажуваат дека демократот Џо Бајден ја освоил државата, додека неговиот правен тим притиска со напади за наводна широка измама без докази.

Резултатите од Џорџија покажаа дека Бајден го победи Трамп со 12.670 гласови од околу 5 милиони гласа, или 0,25 проценти. Државниот закон му дозволува на кандидатот да побара пребројување на гласовите ако разликата е помала од 0,5 отсто. Републиканскиот гувернер Брајан Кемп го официјализираше државниот список со 16 претседателски електори.

Кампањата на Трамп рачно предаде писмо до канцеларијата на државниот секретар со барање за пребројување на гласовите на изборите. Во изјавата на правниот тим на Трамп се вели: „Денес кампањата Трамп поднесе петиција за пребројување на гласовите во Џорџија. Фокусирани сме на тоа да осигураме дека се следи секој аспект на државниот закон на Џорџија и Уставот на САД така што секој законски глас е избројан“.

Во петокот, при потврдувањето на избирачите во државата, Кемп исто така изнесе загриженост за потписите. Но, републиканскиот државен секретар Бред Рафенспергер ја потврди довербата во резултатите и во саботната колумна во „Вашингтон пост“ тој напиша: „Системот на гласање на Џорџија никогаш не бил посигурен или подоверлив“.

И, всушност, потписите на апликациите за гласање и пликовите за отсутни лица се бараат да се проверат кога ќе бидат примени.

Подоцна во саботата, Рафенспергер му испрати писмена порака на неговиот заменик во кој го замолува официјално да ги извести изборните директори на окрузите да се подготват за пребројувањето и да ги известат политичките партии за да можат да соберат набљудувачи на соодветните места.

Пребројувањето ќе се изврши со помош на скенери што ги читаат и табелираат гласовите. Вработените во изборните окрузи веќе направија целосно рачно пребројување на сите гласови во трката за претседател. Но, тоа произлезе од задолжителното ревизорско барање и не се смета за официјално пребројување според законот. (АП)